Конкурсот за издавање учебници во деветгодишното основно образование е запрен бидејќи ќе следуваат измени и дополнувања на Концепцијата за основно образование. Оваа одлука е донесена согласно заклучокот од седницата на Владата од минатата недела, објави Министерството за образование.

Измените на Концепцијата, велат од МОН, се „во насока на соодветно изучување на научните дисциплини историја, географија, биологија, хемија и физика како посебни наставни предмети, а кои сега се изучуваат интегрирано во наставните предмети „Историја и општество“ и „Природни науки“ (од шесто до деветто одделение)“.

Во објавата за запирање на конкурсот кој е објавен пред три месеци, МОН го известува авторот односно авторите кои доставиле ракопис во архивата на Педагошката служба, заклучно со 8 јули 2024 година, дека тој може да се подигне од Педагошката служба најдоцна 15 дена од објавата на ова соопштение.