Во петокот вечерта, најмалку 137 луѓе беа убиени во напад на концертна сала во близина на Москва. Милитантната исламистичка група Исламска држава ја презеде одговорноста за најсмртоносниот напад во Русија во последните 20 години.

Очевидци на настанот ги опишаа застрашувачките моменти од нападот на вооружените напаѓачи кои по случаен избор пукаа во луѓето во концертната сала „Крокус“.

Руската државна новинска агенција РТ ја снимила девојката која била сведок на нападот и сега лежи во болнички кревет. Левата страна од лицето и е отечена, а левата рака е преврзана.

Таа раскажа како напаѓачите ја забележале неа и мала група луѓе кои се обидувале да побегнат од местото на масакрот.

„Не видоа. Еден од нив истрча и почна да пука. Паднав на подот и се преправав дека сум мртва. Крвавев. Тие пукаа во телата на подот. Девојката која лежеше до мене е убиена“, рече таа.

Отпрвин мислевме дека е дел од концертот

Нападот се случи неколку минути пред почетокот на распродадениот концерт на Пикник, руски рок бенд основан во Ленинград во 1970-тите. Многу од посетителите на концертот на почетокот мислеа дека пукањето е дел од настапот.

„Во еден момент слушнавме силен тресок, мислевме дека е дел од концертот. Но, набрзо сфативме дека нешто страшно се случува, сфативме дека се работи за пукање“, изјави за „Гардијан“ Арина, 27-годишен клинички психолог од Москва.

Тогаш Арина видела маж во маскирна облека како влегува во салата држејќи автоматска пушка.

„Сите лежевме на подот. Погледнав наоколу и видов многу повредени, беа облеани во крв“, рекла таа и додаде дека успеала да побегне од салата, по што истрчала по ескалаторите.

„Кога истрчав долу, видов крв насекаде, имаше многу тела на подот. Луѓето се обидоа да ги носат оние кои беа во несвест“, рече таа.