Израелските сили за воздушна одбрана денеска објавија дека пресретнале две ракети лансирани од Либан над регионот Кармел јужно од Хаифа, во Северен Израел.

Сирените се огласија во северната крајбрежна област на Израел, вклучувајќи ги Цезареја и Зихрон Јаков и блиските градови јужно од Хаифа, објави утринава Тајмс оф Израел.

Засега нема извештаи за повредени или за материјална штета.

Нападот утринава се случи еден ден откако војската соопшти дека Хезболах истрелал 180 проектили кон Израел, главно кон Хаифа.

Во неделата, за прв пат од почетокот на војната, беа лансирани либански проектили кон Хаифа, при што беа повредени најмалку десет лица, пренесува Танјуг.