Новиот директор на Агенцијата за национална безбедност Бојан Христовски од поставувањето на функцијата го „тресат серија скандали“. Од СДСМ секојдневно преку соопштенија бараат да се разреши новопоставениот шеф на тајната служба, а побараа и од Јавното обвинителство да отвори истрага, за како што велат, „незаконското поставување на Христовски на чело на АНБ“.

Од Обвинителството пак, за Телма, велат дека ќе ја чекаат разрешницата во антикорупциската комисија за случајот, откако до ДКСК стигнала анонимна претставка со наводи дека Христовски е незаконски именуван на функцијата.

Како што информираа од Обвинителство, за да нема дуализам во постапката, веднаш по завршувањето на таа постапка во ДКСК, ќе постапат согласно своите законски овластувања.