Во своето годишно обраќање пред амбасадорите во Ватикан, папата рече дека противењето на Ватикан за абортусот е како и неговото противењето на смртната казна, бидејќи и двата чина се нарушување на основното право на живот. Тој додаде дека смртната казна е „недозволива“ во сите околности.

– Правото на живот е загрозено и на места каде што сè уште се изрекува смртна казна, како што е случајот деновиве во Иран, каде демонстрантите бараат поголемо почитување на достоинството на жената, рече папата, додавајќи дека правдата не може да се постигне со смртна казна.

Тој посочи дека тоа „не претставува заплашување, ниту пак обезбедува правда за жртвите, туку само ја поттикнува жедта за одмазда“.

Ова е првпат папата да ги спомне демонстрациите во Иран кои траат од септември кога Махса Амини почина по апсењето, бидејќи наводно неправилно носела хиџаб.