Во Армискиот центар за обука на вода во Охрид, денеска, ќе се одржи централната свеченост по повод 18 Август – Денот на Армијата.
На свечената церемонија на 27-от роденден на Армијата, со пригоден говор ќе се обратат претседателот на Република Северна Македонија, Стево Пендаровски и вицепремиерката и министерка за одбрана, Радмила Шекеринска.
На свеченоста ќе присуствуваат претставници од највисокиот државен и воен врв на земјава, поранешни министри за одбрана и началници на генералштабот, пензионирани генерали, претставници на дипломатскиот кор, институции со кои соработува Армијата и други.
На одбележувањето на роденденот на Армијата ќе присуствува и командантот на Националната гарда на Вермонт полковник Грегори Најт кој е во повеќедневна посета на земјата и по повод одбележување на уште еден јубилеј – 25 години од билатералната соработка.
-Ние сме тука и секогаш даваме поддршка за вашето членство во НАТО и истовреме очекуваме да станете 30-та членка на Алијансата, порача полковник Најт кој најави дека во следниот период планираат да го зголемат нивото на соработка.
На заедничката прес-конференција по средбата во Министерството за одбрана, министерката Шекеринска истакна дека 25-годишното партнерство со НГ на Вермонт е вградено во достигнувањата на нашата Армија, на нашиот одбранбен систем и се одбележува токму во време кога практично ги броиме последните денови до нашето полноправни членство во НАТО.
Меѓу гостите на централната прослава на Денот на Армијата ќе биде и висока делегација на Вооружените сили на Република Бугарија, предводена од началникот на Генералштабот, генерал Андреј Боцев, која исто така престојува во повеќедневна официјална посета на земјава.
Спроти Денот на Армијата, вчера во касарната „Илинден“ во Скопје се изврши почесна артилериска стрелба со истрел од 10 плотуни од шест артилериски орудија (хаубица 105 мм.).
Пронајдете не на следниве мрежи:
