Американскиот претседател Џо Бајден изјави дека „ќе има последици“ за односите меѓу САД и Саудиска Арабија откако ОПЕК +, група земји производители на нафта, минатата недела објави дека ќе ја намали производната квота, пренесува Ројтерс.
Изјавата на Бајден дојде еден ден откако демократскиот американски сенатор Боб Менендез, претседател на Комитетот за надворешни односи на Сенатот, рече дека САД мора веднаш да ја замрзнат секаква соработка со Саудиска Арабија, вклучително и продажбата на оружје.
Во интервју за Си-Ен-Ен, Бајден не сакаше да појасни какви чекори размислува.
Прес секретарот на Белата куќа, Карин Жан-Пјер, рече дека ќе се изврши преглед на политиката, но не даде временска рамка за какви било активности или информации за тоа кој ќе го води повторното оценување. Таа изјави дека САД внимателно ќе ја следат ситуацијата „во следните недели и месеци“.
Министерот за надворешни работи на Саудиска Арабија, принцот Фајсал бин Фархан изјави дека одлуката на ОПЕК + е чисто економска и дека земјите членки едногласно ја усвоиле.
„Членките на ОПЕК + постапија одговорно и донесоа соодветна одлука“, изјави принцот Фајсал за телевизискиот канал Ал Арабија.
ОПЕК +, група производители на нафта која ја сочинуваат Организацијата на земјите извознички на нафта (ОПЕК) и сојузниците, вклучително и Русија, ја објави производствената квота по неколку недели лобирање од страна на американските официјални лица против таквиот потег.
Соединетите Американски Држави ја обвинија Саудиска Арабија дека застанува на страната на Русија, која се противи на западните ограничувања на цената на руската нафта како одговор на руската инвазија на Украина, наведува Ројтерс.
Американските власти тивко се обидуваа да ја убедат Саудиска Арабија да се откаже од идејата за намалување на производството, но де факто владетелот на Саудиска Арабија, престолонаследникот Мохамед бин Салман, не се согласи.
Бин Салман и Бајден се судрија за време на посетата на Бајден на Џеда во јули поради смртта на новинарот на Вашингтон пост Џамал Кашоги во 2018 година.
Пронајдете не на следниве мрежи:
