Германскиот претставник Борусија Дортмунд го совлада холандски ПСВ Ајндхобен со 2:0 (1:0) пред своите гледачи во реваншот од осминафиналето на Лигата на шампионите и со вкупни 3:1 се пласираа во четвртфиналето.

Стрелец на голот за 1:0 беше Џејдон Санчо веќе во 3. минута од натпреварот. Марко Ројс ја затвори приказната со погодокот за 2:0 во петтата минута од судиското продолжение на натпреварот.

Борусија беше подобриот тим и на првиот меч одигран во Ајндховен, каде ПСВ израмни од многу сомнително досудениот удар од белата точка, а германскиот вицешампион реши да покаже дека е подобар противник уште од првата минута од мечот на својот „Вестфален“ стадион.

На избраниците на Един Терзиќ им беа потребни неполни три минути за да поведат. Топката се одби на работ од шеснаесетникот од неколку играчи на домашните и гостинските екипи, за на крајот да заврши на дваесетина метри од голот на ПСВ во нозете на Џејдон Санчо. Англискиот репрезентативец не ги искомплицира работите, со еден потег вдесно си ослободи простор за шут и со таа брза реакција го изненади гостинскиот голман Валтер Бенитез, кој доцна ја виде топката за да може да интервенира.

Домашниот тим веќе во првото полувреме требаше да има повеќе од еден гол предност, но тоа не се случи благодарение на одличните реакции на голманот на ПСВ и непрецизноста на домашните напаѓачи, пред се Дониел Мален. Бенитез во 16. минута одбрани прецизен удар на Јулијан Брант, а веќе во следната акција спречи обид на Мален. Истиот играч имаше одлична шанса во 27. минута, но го промаши голот. Во 40. минута уште еднаш се најде во стопроцентна шанса и повторно ја испрати топката покрај стативата.

Мален третпат имаше одлична прилика во 49. минута, но Бенитез спречи нов гол. ПСВ потоа беше поопасен, па домашниот голман Грегор Кобел имаше работа. Во 53. минута Хирвинг Лозано ја погоди стативата, а три минути подоцна Кобел го одбрани ударот на Џордан Тезе. Во 71. минута шанса имаше и Јохан Бакајоко, но гостите не успеаја да израмнат.

Во 77. минута се радуваа домашните навивачи, кога Марко Ројс од слободен удар упати нафрлување кон Никлас Фуелкруг, кој го совлада Бенитез. Сепак, голот беше поништен со интервенција од ВАР-собата, поради офсајд позиција на домашниот напаѓач.

На крајот од натпреварот Лук де Јонг пропушти две одлични можности за ПСВ. Во 85. минута неговиот удар од шеснаесетникот, дијагонално од левата страна, го одбрани Кобел, а во четвртата минута од судиското продолжение Холанѓаните ја проиграа домашната одбрана, но Де Јонг ја испрати топката преку гредата. Во следната акција Борусија го потврди додавањето. Марко Ројс ја искористи грешката на гостинската одбрана, се втурна кон голот на ПСВ и мирно ја испрати топката покрај Бенитез во мрежата за конечни 2:0 и пласман на тимот од Дортмунд во четвртфиналето.