Критиките кон руското воено раководство продолжуваат откако голем број руски војници беа убиени во новогодишниот украински напад врз импровизирана касарна во окупираната Макиивка.

Зградата била уништена во ударот, што укажува на тоа дека муницијата била складирана во близина на местото каде што престојувале војниците. Ракетниот напад врз училиштето во кое наводно биле стационирани околу 600 руски војници, досега резултираше со потврдени 89 смртни случаи. Украинците велат дека убиле 400 војници.

Пензионираниот вицемаршал на воздухопловните сили Шон Бел тврди дека Русија направила неколку фатални грешки кои довеле до нападот. Во изјава за Sky News, тој објасни дека Украинците ги пресретнале руските комуникациски канали за да можат да одредат каде да целат. Руските војници имаат сигурни канали за комуникација, но овие системи не се достапни за секого, а руските војници често користат мобилни телефони.

Бел верува дека многу руски војници по полноќ се обиделе да стапат во контакт со своите најблиски во Русија за да им посакаат среќна 2023 година. Големиот број појдовни повици од мобилни телефони, испратени во исто време, им откриле на Украинците точно каде е руската армија се наоѓаше во окупираниот град .

„Тие никогаш не требаше да бидат таму, никогаш не требаше да ги користат своите мобилни телефони. Затоа беа изложени на овој напад со катастрофални последици“, вели Бел.

Тој додава дека модерното војување бара „дисциплина и професионализам, што отсуствува во регрутираната војска“.

Роб Ли, висок соработник во Институтот за истражување на надворешната политика, рече дека Москва имала проблеми во текот на зимата со обезбедувањето безбедно сместување за новомобилизираните трупи во близина на фронтот.

„Потешко е да се растураат единиците бидејќи руската армија нема развиен механизам за управување со мали единици, кај нив сè е централизирано. Но, поставувањето војници во близина на муниција е едноставно непростлива грешка“, додаде тој.