Бројот на жртви во силниот земјотрес на Тибет се искачи на 95 лица, а според кинеските медиуми, повредени се околу 130 лица.

Во земјотресот со јачина од 7,1 степени се уништени стотици згради, а спасувачките служби се на терен.

Земјотресот ги вознемири и жителите на Катманду, главниот град на Непал, на околу 230 километри од епицентарот. Земјотресот ги разбудил од сон, а многумина во паника ги напуштиле домовите. Сè уште нема информации за оддалечените и планински области на Непал поблиску до епицентарот.

Според извештаите, повеќе од стотина станбени згради се уништени, додека областа била зафатена и од десетици последователни потреси. Околу 1.500 спасувачи и пожарникари се распоредени на теренот за да ги пребаруваат урнатините и да им пружат помош на повредените, соопшти кинеското Министерство за вонредни ситуации.

Просечната надморска височина во подрачјето на епицентарот е околу 4.200 метри, што ги отежнува спасувачките операции. Кинескиот центар за земјотреси соопшти дека епицентарот бил на околу 75 километри североисточно од Монт Еверест.

УСГС, исто така, наведе дека во овој регион во изминатиот век се случиле десет земјотреси со јачина од најмалку 6 степени, што потврдува дека тоа е едно од сеизмички најактивните области во светот.