Десетици илјади луѓе им се придружија на студентите на денешниот протест во Белград, чија цел беше да се сврти вниманието кон нивните барања во врска со трагедијата на железничката станица во Нови Сад. Студентите, кои мирно протестираат веќе со недели, овојпат ги поддржаа средношколци, земјоделци, здравствени работници, јавни личности и други граѓани.

Според министерството за внатрешни работи, собирот на плоштадот Славија привлече околу 29.000 луѓе. По чистењето на Славија, каде што беа изведени студентски перформанси, студентите кажаа дека ќе се вратат на своите блокади. На Славија беа истакнати транспаренти „Рацете ви се крвави“ и „Сите сме под настрешница“.

Сите присутни побараа одговорност за трагедијата во Нови Сад на 1 ноември, во која животот го изгубија 15 луѓе и процесуирање на насилниците кои постојано провоцираат на мирните блокади. Тие се одржуваат на белградскиот и новосадскиот универзитет и на факултетите во Ниш и Крагуевац, каде што студентите ја спроведуваат акцијата „15 минути тишина“.

Претседателот Александар Вучиќ вчера кажа дека нема да попушти пред студентите и најави давање субвенции за купување стан или куќа за млади.