Жителите на местото Голд Хил во американската сојузна држава Колорадо цела ноќ се прашувале кој упорно свири со автомобилска сирена и не им дава да спијат. Вистината ги изненадила – виновникот била црна мечка, која останала заклучена во спортско теренско возило, пишува „Вајс“.

Според локалните медиуми, животното влегло во незаклучениот автомобил во потрага по храна. Откако успеала да ја затвори вратата зад себе, останала заробена во возилото. Обидувајќи се да излезе, мечката се движела низ кабината и повеќепати ја активирала сирената, која одекнувала речиси до изгрејсонце.

Кога се разденило, соседите од безбедно растојание со долго јаже ја отвориле возачката врата. Штом добила можност да избега, мечката веднаш истрчала во шумата.

Зад себе оставила значителна штета – целосно уништена внатрешност, оштетена каросерија и активирано воздушно перниче на возачката страна, што укажува дека во еден момент го активирала безбедносниот систем на возилото.

Иако звучи необично, вакви случаи не се реткост, особено во делови од САД каде мечките често се доближуваат до населени места во потрага по храна.

Во Колорадо уште во 2016 година службите спасиле мечка која се заклучила во паркиран автомобил, а претходно ја уништила неговата внатрешност.

Сличен случај бил забележан во Северна Каролина во 2017 година, каде мечка останала заробена во автомобил, при што ги искинала седиштата и ги активирала воздушните перничиња.

Во 2023 година, во Саут Лејк Тахо во Калифорнија, полицијата ослободила мечка која речиси целосно ја уништила внатрешноста на едно возило. Од локалната организација за заштита на мечките тогаш изјавиле дека во регионот секојдневно се регистрираат бројни случаи на мечки кои отвораат автомобили во потрага по храна.

Истата година, во Конектикат, мајка мечка и едно од нејзините младенчиња останале заробени во автомобил, додека второто младенче чекало надвор. И во тој случај внатрешноста на возилото била сериозно оштетена пред животните да бидат ослободени.

Надлежните служби постојано апелираат возачите во областите каде има мечки никогаш да не оставаат храна во автомобилите и секогаш да ги заклучуваат возилата, бидејќи мирисот на храна лесно ги привлекува дивите животни.