По неуспешниот бунт од 24. јуни, претседателот на Русија, Владимир Путин, изјави тогаш дека на чело на Вагнер би сакал да го види Андреј Трошев (61 г.) или попознат како Седи.

Точно 18 месеци од почетокот на руската инвазија на Украина и еден ден по смртта на лидерот на Вагнер, Евгениј Пригожин, кој, според руските власти, загинал во авионска несреќа додека патувал од Москва за Санкт Петербург, во Русија веќе се шпекулираше за неговиот наследник на т.н. „готвач“.

Според некои извори, тоа наводно би можело да биде миленикот и послушник на Владимир Путин, 61-годишниот Андреј Трошев, познат како Седи. Имено, според медиумите, пет дена по неуспешниот бунт на борците на Вагнер пред два месеци, Владимир Путин се сретнал со Евгениј Пригожин и со други високи борци на Вагнер. Тогаш Владимир Путин наводно предложил Андреј Трошев да им биде командант наместо Евгениј Пригожин. Владимир Путин потоа им понуди на платениците на Вагнер неколку опции за продолжување на нивната работа, вклучувајќи ја и опцијата да продолжат да се борат под раководство на Андреј Трошев.

Според документите за санкции на Европската унија, Андреј Трошев е пензиониран полковник кој се истакнува како еден од извршните директори на групата Вагнер. Завршил артилериска академија. Документите на Европската унија детално ја прикажуваат улогата на Андреј Трошев како „началник на Генералштабот“ на операциите на групата Вагнер во Сирија, каде што групата и даваше поддршка на сириската Влада под раководство на Башар ал Асад.

„Андреј Трошев директно учествувал во воените операции на Вагнер во Сирија“, се наведува во документите за санкциите. Андреј Трошев бил тесно поврзан со неколку истакнати личности во групата Вагнер, вклучувајќи го и основачот Димитриј Уткин, кој исто така загина во авионската несреќа од претходниот ден.

Ветеран од многу војни, Андреј Трошев служел во Авганистан за време на Советско-Авганистанската војна и се истакнал во Северен Кавказ, особено во Чеченската војна, додека служел во руската Армија. Бил и командант во СОБР, специјална единица за специјална брза реакција на Министерството за внатрешни работи на Русија.

За неговите заслуги, Андреј Трошев два пати бил одликуван со Орден на Црвена звезда за неговата служба во Авганистан. Во 2016 година ја доби највисоката руска награда „Херој на Русија“ за раководење на нападот на Палмира во Сирија против терористите на Исламската држава.

Да потсетиме, во средата во областа Твер на Руската Федерација се урна авион со 10 лица, а како што соопшти руската агенција за цивилно воздухопловство Росавијација, меѓу патниците бил и Евгениј Пригожин.