Русија започна со масовно производство на бомби со 3 тона експлозив кои планира да ги користи во Украина, соопшти денеска руското Министерство за одбрана, додавајќи дека производството на воздушни бомби ФАБ-3000 започнала во февруари.
Сергеј Шојгу, министерот за одбрана, исто така бил информиран дека масовното производство на неколку други бомби – ФАБ-500 и ФАБ-1500 – исто така е зголемено, објави руски Спутник, а објавено е и видео од Шојгу во објект за производство на такви бомби.
FAB-3000 тежи 3.000 килограми, тоа е воздушна бомба за општа намена која се користи за уништување на утврдени воени и индустриски објекти и засолништа. На почетокот на овој месец, руските воени блогери објавија видеа од т.н лизгачки бомби FAB-1500, кои тежат 1.500 килограми и уништуваат повеќекатници во градовите контролирани од Украина во близина на линијата на фронтот во Донбас.
Таквите бомби можат да уништат секој европски град
Лизгачките бомби од 3.000 килограми експлозив се исклучително опасно оружје, а полесните верзии на таквите бомби веќе ја променија ситуацијата на фронтот во корист на Русија.
„Додека Западот е зафатен да му кажува на Путин што не треба да прави, Русија штотуку започна масовно производство на бомби од 3.000 килограми кои можат да уништат кој било европски град. Западниот свет едноставно нема поим што се случува“, објави Jay in Kyiv, Американец што живее во главниот град на Украина.
Русија веќе извесно време користи неколку верзии на моќната воздушна бомба во Украина, која ја десеткуваше украинската одбрана и ја наруши рамнотежата на првите борбени линии. Ова беше направено со претворање на едноставно оружје од советската ера во лизгачка бомба способна да создаде кратер широк 15 метри.
Бомбата е надвор од дострелот на противводушната одбрана
Бомбата се вика ФАБ-1500, тоа е оружје од 1,5 тони, а речиси половина од бомбата е составена од експлозив. Се фрла од борбени авиони, од далечина од 60-70 километри, надвор од дострелот на повеќето украински противвоздушни оружја. ФАБ-1500 е уште еден пример за тоа како Русија води војна во Украина – предизвикува масовно уништување пред да се обиде да ја заземе територијата, пишува Си-Ен-Ен.
Неодамнешните снимки од фронтот во регионот на Доњецк ја илустрираат огромната моќ на овие бомби, кои ги погодуваат термоцентралите, фабриките и облакодери – местата од кои Украинците ја координираат својата одбрана.
FAB-1500 се насочува кон својата цел со помош на систем за наведување и преклопни крила што му овозможуваат да се лизга кон неа.
Џозеф Тревитик, кој пишуваше за развојот на бомбата за TheWarZone, вели дека оружјето „нуди нова и многу поразорна изолирана опција за удар за многу руски тактички авиони, но исто така им помага на пилотите да се држат подалеку од непријателската одбрана“.
– Претходно бевме гранатирани само со артилерија. Сега Русите почнаа да го напаѓаат градот поагресивно и да користат средства како ФАБ-1500. Зошто го користат ? Затоа што нанесува многу сериозна штета. Ако преживеете, сигурно ќе добиете контузии. Тоа врши голем притисок врз моралот на војниците. Не сите наши момци можат да го поднесат тоа иако се повеќе или помалку навикнати на FAB-500 до сега. FAB-1500 е пекол – изјави за Си-ен-ен војник од 46-та независна воздушна бригада на Украина од градот Краснохоривка.
Клучен елемент во руската офанзива кај Авдијивка
Употребата на бомбите ФАБ стана клучен елемент во руската офанзива во регионот на Доњецк, особено во разбивањето на украинската одбрана околу Авдијивка, која падна во февруари.
– Пред и за време на битката за Авдијевка, стотици воздушни бомби беа лансирани за неколку дена. За само 48 часа, 250 од нив беа употребени во правец на Авдијевка – изјави за Си-ен-ен портпарол на украинските воздухопловни сили, Јуриј Ихнат.
ФАБ-1500 е најмоќниот од семејството на „неми бомби“ од советската ера, кои сега се прилагодуваат во евтина, но моќна ракетна верзија во фабрика во близина на Москва. Џастин Бронк, виш научен соработник во Кралскиот институт за Обединети услуги во Лондон, вели дека „производството на лизгачки бомби е тесно грло, додека Русите го имаат основниот пакет со експлозив во огромен број“.
Руско евтино решение за скапите западни проектили
Русите, според тоа, имаат силна огнена моќ со која можат да дејствуваат на фиксна одбрана, зголемувајќи ги украинските жртви, но сепак не доволно за суштински да ја сменат линијата на фронтот.
– Ова не е евтина или брза трансформација, но сепак е многу помалку од милионите долари колку што чинат проектилите. Тоа е ситна сума во споредба со цената на проектилот – изјави Ихнат за Си-ен-ен.
Руските воени блогери почнаа да зборуваат за оружјето минатиот септември, кога беше тестирана точноста на бомбите. Каналот на Телеграм, Fighterbomber забележа дека по многумесечни обиди и грешки, ФАБ-1500 за прв пат прецизно ја погоди целта на бојното поле.
Fighterbomber, кој е близок до руската војска и има речиси половина милион претплатници, тврди дека новоразвиениот комплет за лизгање го зголемил опсегот на бомбите.
За неколку недели, украински и руски извори зборуваа за употреба на огромна бомба во Херсон на југ и Харков на север.
Украинските власти, од претседателот Володимир Зеленски надолу, речиси секојдневно бараат противвоздушно оружје со поголем дострел за да ја одбранат Украина од руската воздушна закана. Борбените авиони Ф-16 со кои сега тренираат украински пилоти, веројатно нема да летаат над Украина до втората половина на оваа година, но тие би можеле да ги принудат руските борбени авиони да се држат настрана.
Во меѓувреме, украинските сили на фронтот, особено во Доњецк, се изложени на жестоки руски воздушни напади – понекогаш повеќе од 100 во еден ден.
Исто како што Русите претходно ги збришаа украинските позиции со интензивна артилерија, тие сега напаѓаат од воздуш и користат навидум неисцрпна залиха од овие разорни бомби за да ги остават украинските сили без средства за одбрана и без засолниште.
