Денес ќе бидат погребани уште четири деца кои во масакарот во училиштето „Владислав Рибникар“ во Белград ги уби полудениот Коста К. (13 г.).

Викендов беа погребани 13 жртви од двата масакри што ја зацрнија Србија. Во саботата во Белград беа погребани четворица ученици и училишниот чувар Драган Влаховиќ. Во селото Мали Орашје и областа Младеновац беа погребани осум лица кои беа брутално ликвидирани од Урош Б. во крвавата гозба што траеше со часови, меѓу кои и полицаецот Милан П., неговата сестра Кристина и нивниот пријател Далибор Т. За два дена 17 лица беа убиени во Србија.

Сите ученици во Србија од денеска се враќаат на редовна настава, освен учениците во основното училиште во Врачар, местото на големата трагедија. Владините мерки стапуваат на сила, а утрово полицајци се распоредени во сите 1.800 училишта во соседна Србија. Тие ќе бидат присутни на сите јавни места каде што се собираат голем број граѓани, пишуваат соседните медиуми.

„Во сите училишта во Србија од денеска од 08:00 часот до крајот на наставата ќе бидат присутни полициски службеници кои превентивно ќе делуваат“, изјави државниот секретар на МВР на Србија, Данило Стевандиќ.

Ангажирањето на дополнителни 1.200 полицајци, вели тој, ќе обезбеди секое училиште да има полицаец кој ќе се грижи за безбедноста на учениците и вработените.

На влезот во основното училиште „Владислав Рибникар“ има четворица полицајци, а вратата од училиштето ја отвораат само вработените. Настава нема, а од денеска ќе се организира продолжен престој за учениците од пониските одделенија, од прво до четврто одделение. Наставата за сите ученици треба да започне во среда, на 10. мај, на седмиот ден од невидената трагедија во Србија.

Од деветте пациенти кои се здобија со тешки телесни повреди во масовното пукање во Младеновац, им е укажана помош во Клиничкиот центар на Србија, а четворица се извадени од апарати за дишење и се во подобра здравствена состојба, еден од пациентите дури е испратен на домашно лекување.

Двајца пациенти се уште се во тешка состојба, едниот има сериозни повреди на црниот дроб, бубрезите и колената, додека другиот има сериозни повреди на главата и окото.

Министерството за внатрешни работи на Србија ги повика граѓаните кои поседуваат нерегистрирано оружје од денеска, 8. мај, до 8. јуни годинава, да го предадат во најблиската полициска станица.

Во овој период граѓаните кои ќе предадат нерегистрирано оружје нема кривично да одговараат, ниту да сносат некакви последици, а не мора да го докажуваат потеклото на оружјето.

Опозицијата во Србија за во 18 часот денес закажа протест наречен „Србија против насилството“ пред зградата на српското Собрание, каде меѓу другото бара разрешување на министерката за полиција Братислава Гашиќ и началникот на БИА, Александар Вулин, како и откажување на ријалити шоуата и емисиите кои промовираат насилство, агресија, неморал, како и забрана на печатените медиуми кои промовираат примитивизам и емитуваат лажни вести. Дополнително, се бара и разрешување на раководството на јавниот сервис поради емитување програми кои промовираат насилство и криминал.

„Ова е моментот кога секој ‘граѓанин’ може да поднесе оставка од позицијата ‘граѓанин’, а со тоа да се апелира до секое човечко суштество да го преиспита своето место и одговорност во создавањето на универзалното ‘лудило’. Како дојдовме до оваа точка, што се замижавме, колку пати рековме дека нешто не е наша работа затоа што е туѓа работа, колку пати ја свртевме главата и бевме уморни да реагираме, слушаме, гледаме… Секој од нас може да си го постави ова прашање и сигурно, ако е искрен со себе, ќе најде некои ситуации или многу од нив, пред кои замижувал, избирајќи ја комфорната зона наместо поддршка, разбирање и сл. Кризата на вредностите на едно општество не може сурово да им се припише на опозициските партии, бидејќи тоа е толку бесмислен облик на манипулација, осудувајќи ги да ја искористат трагедијата за евтини политички поени…“, се вели во соопштението до српската јавност од опозицијата.

Општинскиот комитет на Српската напредна партија (СНС) во Врачар, по повод најавените признанија на опозицијата, излезе со соопштение полно со навреди:

„Опозицијата во најболниот момент во Србија изгледа како насилник, на злобен силеџија. Но, нивните карикатурни ментални способности, денес, не се ништо помалку од монструозни. Безличното зло, потопено во својата извртена амбиција, се осмелува да ја искористи оваа национална трагедија за свој личен интерес. Нивното уништување им оневозможува да сфатат дека тука е во прашање болката на српскиот народ и борбата за зачувување на семејството. Тоа им оневозможува да разберат дека за два дена е напишана нова ‘крвава бајка’. Тоа им оневозможува да разберат дека овде се загрозени правата на секое дете на живот и слобода. Тоа ги спречува да сфатат дека се на маргините на српското општество, очигледно необразовани и дефицитарно интелигентни и дека како такви доживуваат морална криза и ентропија на вредности. Дали повикувате на протест за време на денови на жалост ? Останете во темнина и тивко пропаѓајте, господа! Таму припаѓате“.

Во меѓувреме, Александар Вучиќ е во тотална медиумска офанзива. Како што изјави за време на гостувањето на РТС вели: „Бараат протести, бараат веднаш да го ослободиме детето-монструм!“. Видео-снимката од гостувањето на Александар Вучиќ веднаш стана вирален „хит“ на социјалните мрежи.

„Дали е ова неговата најголема лага во последните 11 години ? Монструозно!“, напишал човекот кој го сподели споменатиот видео-клип на социјалните мрежи.