Извор од Кремљ тврди дека Путин би побегнал во Аргентина или Венецуела доколку биде соборен од власт.

Рускиот претседател Владимир Путин можеби планира да избега од Русија во случај на пораз, според бројни извори. Теоријата за можно бегство се појави откако беше откажана традиционалната прес-конференција на Путин, како и неговите „разговори со луѓе“, кои можат да траат и повеќе од четири часа, пишува британскиот портал Express.

Двата настани се емитуваат во живо на руската државна телевизија и се сметаат за клучни елементи за прикажување на Владимир Путин како „семоќен“ татко на нацијата.

„Сето ова засега е сомнително. Овие настани се клучни за чувството на стабилност. Луѓето се веќе очајни“, рече руската политиколог Екатерина Шулман и потоа објасни.

Неуспесите на руската војска во Украина значат дека Кремљ веќе почнал да подготвува планови за безбедно засолниште за Путин во случај Русија да претрпи понижувачки пораз и тој да биде принуден да ја напушти земјата, според поранешниот текстописец на Путин, Абас Гаљамов.

Гаљамов, кој сега работи како политички аналитичар, цитираше извор од Кремљ дека Путин ќе побегне во Аргентина или Венецуела доколку биде соборен. Се верува дека името на планот е „Ноевата арка“.

„Соработниците на Путин не ја отфрлија можноста тој да ја загуби војната, да биде соборен од власт и да мора итно да се евакуира“, напиша Гаљамов на Телеграм.

Шефот на државната нафтена компанија Роснефт, Игор Сечин, наводно ги надгледува плановите за можното бегство на Путин во Венецуела. Тој е еден од најблиските сојузници на Путин и се верува дека има блиски односи со венецуелскиот претседател Николас Мадуро. Малку детали се познати за наводниот план за евакуација на Путин во Аргентина, доколку неговиот режим биде соборен, пишува британскиот портал Express.