Српскиот министер за образование, Дејан Вук Станковиќ, изјави дека министерството што го води размислува за скратување на училишното време од 45 минути на 30 минути.
Тој истакна дека причината за ова е што децата не можат да се фокусираат 45 минути.
„Размислуваме за ова отворено и јасно. Постои еден вид психолошко оправдување – под влијание на новите технологии постои феномен на дифузно внимание. Не можете да бидете фокусирани на една тема, но многу лесно преминувате од една содржина на друга. Ова има последица дека децата не можат да се фокусираат 45 минути, што е максимално време за концентрација за зрели луѓе“, изјави Станковиќ за Радио и телевизија на Србија.
Тој истакна дека постапката за скратување на часовите не е лесна, но дека се покренува дебата за ова прашање.
„Слушаме различни аргументи за и против. После тоа доаѓа практичниот дел, што подразбира институционална реорганизација на распоредот на часовите, распределба на наставен кадар и можеби прием на нови луѓе бидејќи ќе има повеќе часови. Има многу средни чекори додека не се започне, но можеби ќе започнеме со пилот-програма бидејќи промените во образованието мора да бидат рационални“, истакна тој.
Ефектите од промените, додава тој, би се мереле на неколку начини. Имено, како што рече, првенствено според постигнувањата на учениците во различни форми на знаење и во однос на одредени вештини што треба да се стекнат во училишниот процес.
„Тоа е единствениот суштински критериум – дали учат подобро, дали се повеќе мотивирани да учат и дали исходот од тоа учење е поедноставен и поефикасен“, оцени тој.
Станковиќ посочи дека се разгледува и делумна или целосна забрана за употреба на мобилни телефони во училиштата.
The post Во Србија се разгледува скратувањето на училишните часови од 45 на 30 минути appeared first on Во Центар.
