Германија делумно ги затвори границите со две држави, ЕУ го осуди ваквиот чекор

Германија денес делумно ги затвори своите граници со Чешка и австрискиот Тирол поради ширењето на новите видови на коронавирус и покрај осудата на ваквата постапка од Европската унија.
Илјадници полицајци се мобилизирани за строги контроли на границите, што потсетува на првите денови од пандемијата, кога членките на ЕУ ги затворија своите граници.
На преминот Киферсфелден во јужна Баварија, полицајците го запираат секое возило што доаѓа од Австрија.
Според новите правила, кои важат до 17 февруари, во Германија може да се влезе само со негативен тест за коронавирус.
Исклучок се работниците во здравствениот и транспортниот сектор и за влез од итни хуманитарни причини, соопшти Министерството за внатрешни работи.
Европската комисија ги осуди новите германски ограничувања.
„Стравот од нови мутации на коронавирусот е разбирлив. Но, вистината е дека вирусот не може да се запре со затворени граници“, рече европскара комесарка за здравство, Стела Киријакидес, за германскиот весник „Аугсбургер алгемајне“.
Германскиот министер за внатрешни работи Хорст Зехофер ги отфрли критиките од Брисел. „Доста е“, рече Зехофер за Билд. „ЕУ направи доволно грешки со бавното воведување на вакцини“, рече Зехофер.

Пронајдете не на следниве мрежи:©ПУЛС24.МК Вестите на интернет страницата на редакцијата ПУЛС24.МК може да се користат исклучиво за лично информирање. Без писмена дозвола од ПУЛС24.МК или посебен договор, не е дозволено преземање, користење или реемитување на вестите.