По дванаесет години, Грција од саботата повеќе не е под финансиски надзор на ЕУ. Ова е крај на болниот период за Грција кој доведе до економска стагнација и поделба во општеството, изјави премиерот Киријакос Мицотакис во Атина. Тој сега им вети на своите сонародници нов почеток „полн со раст, единство и просперитет“.
За време на финансиската и должничката криза , европартнерите и Меѓународниот монетарен фонд (ММФ) ја спасија Грција од национален банкрот неколку пати од 2010 година со заеми во вкупна вредност од речиси 289 милијарди евра. Третата заемна програма за задолжената земја заврши во август 2018 година. Грција го напушти Европскиот механизам за стабилност (ЕСМ), но остана под внимателно набљудување.
Должничката криза и строгите мерки за штедење наметнати од меѓународните кредитори резултираа со драстични загуби за многу Грци. Условите за спасувачките заеми беа масовни кратења на пензиите и платите, месечната минимална плата тогаш падна на помалку од 600 евра. Имаше и зголемување на даноците и приватизации. Грчката економија се намали за повеќе од 25 отсто, невработеноста се искачи на речиси 28 отсто, а квалификуваните работници масовно ја напуштија земјата.
„Денешна Грција е поинаква Грција“, рече Мицотакис. 20 август 2022 година е „историски ден за Грција и сите Грци“, рече Мицотакис на државната телевизија. Грција неодамна забележа силен економски раст и значителен пад на невработеноста.
Мицотакис нагласи дека и без контролите, грешките што во последните години доведоа до тешка финансиска криза во Грција во никој случај не треба да се повторат. Ќе има зголемување на платите и намалување на даноците, но тоа не треба да ги поткопа напорите за балансирање на финансиите.
Покрај министрите за финансии на евро-земјите, изминатите денови ослободувањето од Бордот на доверители од 20 август го одобри и одговорниот еврокомесар Паоло Џентилони.
Комисијата на ЕУ, исто така, ги пофали напорите на грчкиот народ и нивните влади. „Грција денес затвора тешко поглавје во својата долга и горда историја“, рече Џентилони.
Достигнувањата на Грција се уште повеќе за пофалба бидејќи тие беа обликувани од два тешки надворешни шока, пандемијата на корона и руската инвазија на Украина. Претседателот на Еврогрупата, Пашал Донохое на сервисот за кратки пораки Твитер истакна дека крајот на контролите е „големо достигнување на грчката влада и грчкиот народ“.
Пронајдете не на следниве мрежи:
