Соединетите Американски Држави (САД) и нивните сојузници, откако украинските пилоти ќе бидат обучени да управуваат со авиони F-16 во наредните месеци, ќе одлучат кој и во колкава количина ќе ги достави овие авиони во Киев. Ова го соопшти на брифинг советникот за национална безбедност на американскиот претседател Џејк Саливан.

„Сега продолживме да зборуваме за зајакнување на украинските воздухопловни сили како дел од нашата долгорочна посветеност на самоодбраната на Украина. Како што напредува обуката, ќе работиме со нашите сојузници во текот на следните месеци за да утврдиме каде ќе бидат префрлени авионите, кој ќе ги префрли и колку“, објаснил Џејк Саливан.

Како што претходно објави CNN, американскиот претседател Џо Бајден ги информирал лидерите на Г-7 дека државите ќе ги поддржат мерките на сојузниците за обука на украински борбени пилоти, вклучително и за моќниот авион F-16.

Русија испрати нота до земјите од НАТО во врска со испораката на оружје за Украина. Министерот за надворешни работи на Русија, Сергеј Лавров, претходно истакна дека секој товар што содржи оружје за Украина ќе стане легитимна цел за Русија.

Министерството за надворешни работи на Русија соопшти дека земјите од НАТО „си играат со оган“ со тоа што и доставуваат оружје на Украина.