Познато е дека губиме повеќе коса во текот на зимските месеци, но и во текот на бременоста, кога хормоналните промени можат да влијаат на циклусот на раст на косата.
Но, дали некогаш сте се исплашиле затоа што вашата четка за коса е полна со влакна? Или можеби забележавте дека по миењето на косата, бањата е покриена со паднати влакна? Ако ви се случило ова, сигурно сте се запрашале дали е нормално и дали треба да се грижите за здравјето на вашата коса.
Губењето на косата е природен процес, но понекогаш може да стане поизразено од вообичаено. Американската академија за дерматологија објави статија во која објаснија колку коса губиме дневно и колку опаѓањето на косата е во нормални граници.
Во кои ситуации повеќе губиме коса?
Ако забележите дека вашата коса опаѓа повеќе од порано, може да имате прекумерно опаѓање (познато како телоген ефлувиум). Оваа состојба често се јавува по одредени стресни ситуации, како што се нагло слабеење, породување, голем стрес како губење на саканата личност или прекин на апчиња за контрацепција. Оваа состојба трае меѓу шест и девет месеци, по што косата постепено се враќа во нормала.
Колку коса губиме дневно?
Доколку не сте доживеале ниту една од овие ситуации и се прашувате дали вашето губење на косата е нормално, експертите од Американската академија за дерматологија велат дека е сосема нормално да изгубите од 50 до 100 влакна во еден ден. Ова е дел од природниот процес на обновување на косата и обично не е причина да се грижите.
Ако забележите дека косата ви опаѓа повеќе од вообичаено, не го игнорирајте проблемот. Консултирајте се со дерматолог кој може да утврди дали се работи за привремена состојба или за посериозен проблем. Добрата вест е дека постојат ефективни третмани за многу видови на опаѓање на косата – и колку побрзо дејствувате, толку подобро.
