Три дежурни пунктови во Здравствениот дом Скопје почнуваат да функционираат од денес. Тие се наоѓаат во поликлиниките “Бит пазар“, “Јане Сандански“ и “Ѓорче Петров“, па граѓаните наместо во Клиниката за детски болести или во Детската болница “Козле“ ќе може најпрво таму да побараат здравствена помош за своите деца.
Во пунктовите ќе работат искусни лекари дополнително тренирани во сферата на педијатријата кои ќе бидат во постојана комуникација со дежурните лекари на Клиниката за детски болести и Детската болница “Козле“. По потреба потешките случаи и оние на кои им е потребна болничка нега ќе бидат препраќани во овие две јавни здравствени установи.
Пунктовите ќе примаат пациенти од понеделник до сабота од 19:30 до 07:30 часот, а лабораториите ќе работат секој ден до 23:30 часот. Во недела пунктовите ќе работат 24 часа, а лабораторииите од 8 до 23:30 часот.
