Веќе се знаеше дека дивите свињи во југоисточна Германија имаат високи нивоа на радиоактивен цезиум, што често се припишува на катастрофата во Чернобил во 1986 година. Но, додека нивото на радиоактивност се намали кај другите животни, поради некоја мистериозна причина тие опстојуваа кај свињите, феномен познат како „парадокс на диви свињи“.
Според најновите истражувања, за оваа појава се виновни и тестовите на нуклеарно оружје извршени во средината на 20 век, покрај Чернобил, односно се чини дека поради катастрофата во Чернобил и нуклеарните тестови, свињите и понатаму се контаминирани со радиоактивен материјал преку храната, пишува Science Alert.
Два типа на нуклеарно загадување
Радиоактивното загадување кое допира до животната средина по нуклеарна несреќа претставува значајна закана за екосистемите. По катастрофата во Чернобил, која се случи пред 37 години, забележано е зголемување на радиоактивната контаминација со цезиум, особено цезиум-137, кој има полуживот од околу 30 години.
Но, полуживотот на многу постабилен изотоп (цезиум-135), кој може да се произведе со нуклеарна фисија, трае повеќе од два милиони години. Според претходните истражувања, односот на цезиум-135 и цезиум-137 може да укаже на изворот на самиот цезиум. Високиот сооднос укажува на експлозии на нуклеарно оружје, а низок сооднос укажува на нуклеарни реактори.
Затоа, радиоекологот Феликс Штагер од Универзитетот Лајбниц во Германија и неговите колеги ги анализирале нивоата на цезиум во 48 примероци од месо од дива свиња собрани од ловци од 11 региони на Баварија од 2019 до 2021 година. Нивото на радиоактивен цезиум во 88 отсто од тестираните примероци на месо беше повисоко од германскиот законски праг.
Дивите свињи и денес се „радиоактивни“.
Користејќи го соодносот цезиум-135 и цезиум-137, експертите утврдија дека тестирањето на нуклеарно оружје е одговорно за 12 до 68 проценти од контаминацијата во примероците. Односно, и покрај тоа што Чернобил е главен извор на цезиум кај дивите свињи, околу една четвртина од примероците имаа доволно значаен придонес на цезиум од тестирањето на нуклеарното оружје.
Со оглед на тоа што дивите свињи се хранат на специфичен начин, како што е потрагата по тартуфи, тие апсорбирале различни нивоа на контаминација од двата извори, што придонесува за нивната континуирана „радиоактивност“.
„Оваа студија илустрира дека стратешките одлуки за спроведување атмосферски нуклеарни тестови пред 60-80 години сè уште влијаат на оддалечените природни средини, дивиот свет и човечките извори на храна“, заклучија научниците.
Истражувањето Непропорционално високиот придонес на 60-годишните оружја-137Cs ја објаснува перзистенцијата на радиоактивна контаминација кај баварските диви свињи беше објавено во списанието Environmental Science & Technology.
Пронајдете не на следниве мрежи:
