Познатиот шпански кардиолог д-р Аурелио Рохас упати важно предупредување до сите кои се борат со грип и настинки оваа зима со ибупрофен и спреј за нос.
Тој истакнува дека овие, навидум безопасни и широко користени лекови, во комбинација со некои други, како што е омепразолот, лек кој го намалува лачењето на желудочната киселина, можат да претставуваат сериозен ризик по здравјето.
На својот Инстаграм профил, д-р Рохас предупреди дека одредени лекови против болки, назални деконгестиви и омепразол „можат да ви наштетат на здравјето без да го сфатите тоа“.
„Не зборувам за ретки или необични лекови, туку за оние што многумина од вас ги земаат редовно“, рече тој. Додаде дека голем број луѓе ги користат без да размислуваат за можните последици, особено кога се комбинираат со интензивна физичка активност, што може да биде посебно оптоварување за срцето.
Неочекувана опасност од назални спрејови
Тој посвети посебно внимание на спрејовите за нос, кои се широко користени за ублажување на затнатиот нос и проблемите со синусите. „Ова може да ве изненади: назални деконгестанти“, рече тој. „Да, само оние спрејови или апчиња што ги земате кога имате настинка.“ Тој објасни дека назалните деконгестанти можат да го зголемат крвниот притисок, да го зголемат срцевиот ритам и да предизвикаат аритмии, особено ако се користат непосредно пред интензивно вежбање.
„Проблемот е што многу луѓе ги земаат автоматски, без да размислат како можат да влијаат на кардиоваскуларниот систем за време на физички напор“, предупреди тој.
Неговата препорака е јасна: ако имате настинка, најдобро е да избегнувате напорен тренинг или барем прво да се консултирате со вашиот лекар дали лекот што го земате во моментов е безбеден за вас.
А што е со омепразолот и диуретиците?
Д-р Рохас се осврна и на омепразолот , наведувајќи дека овој лек може да ја промени апсорпцијата на важни минерали и витамини, како што се магнезиумот, железото и витаминот Б12. Ваквите промени, истакнува тој, можат да имаат негативно влијание врз нивото на енергија, закрепнувањето на телото и здравјето на срцето.
На крајот, тој ги предупреди и луѓето кои земаат лекови за намалување на крвниот притисок и се занимаваат со интензивно вежбање. Првенствено зборуваме за диуретици, кои често се препишуваат за хипертензија.
„Диуретиците можат да доведат до губење на калиум и магнезиум“, објасни тој. „Последиците можат да бидат грчеви, забрзан срцев ритам и ненадеен пад на крвниот притисок во средината на тренингот.“
The post Докторот предупредува: Ибупрофенот и капките за нос воопшто не се безопасни appeared first on Во Центар.
