Јапонија во среда објави дека ќе „прилагоди“ финансиски пакет вреден околу 10 милијарди долари за да им помогне на група азиски земји да се здобијат со енергија и да ги зголемат резервите.
Поддршката треба да спречи негативни последици за јапонските синџири на снабдување и главно ќе се обезбедува преку државни финансиски институции, вклучувајќи ја Јапонската банка за меѓународна соработка (JBIC) и Нипон Експорт енд Инвестмент Иншуренс (NEXI).
Најавувајќи го планот за помош, премиерот Санае Такаичи рече дека помошта ќе биде еквивалентна на дури 1,2 милијарди барели нафта, што е приближно колку годишниот увоз на сурова нафта на Асоцијацијата на земјите од Југоисточна Азија (АСЕАН).
Такаичи го објави планот по состанокот на Азиската заедница за нулти емисии (AZEC), иницијатива предводена од Јапонија, започната за забрзување на декарбонизацијата и енергетската транзиција во Азија.
На состанокот присуствуваа, меѓу другите, лидерите на Филипините, Малезија, Сингапур, Тајланд и Виетнам.
„Тесно сме поврзани со азиските земји преку синџири на снабдување и други канали и зависиме едни од други“, изјави јапонскиот премиер пред новинарите по состанокот, издвојувајќи ги медицинските материјали како што се опремата за дијализа и хируршката дренажа.
„Поддршката на синџирите на снабдување на азиските земји, пак, би ја зајакнала јапонската економија“, рече Такаичи.
Планот вклучува кредитирање на локалните компании за снабдување со алтернативни ресурси, како што е суровата нафта од САД, како и финансирање и кредитирање на компании и влади кои се дел од синџирот на снабдување на Јапонија.
Исто така, вклучена е поддршка за диверзификација на изворите на енергија и зголемување на снабдувањето на земјите-партнери преку изградба на складишта.
Земјите од Југоисточна Азија имаат помалку резерви на нафта од Јапонија, што ги прави залихите на деривати, вклучувајќи суровини за пластика, сè поретки.
Прекините во производството во Југоисточна Азија предизвикаа загриженост кај јапонските здравствени работници кои се потпираат на Азија за основни залихи како што се контејнери, цевки и ракавици.
Според Јапонската агенција за природни ресурси и енергија, Азија е дестинација за околу 90 проценти од суровата нафта што поминува низ Ормутскиот теснец.
Јапонската влада објави дека обезбедила четиримесечни резерви на нафта и нафтени производи за домашна употреба, но сè поголем број производители се жалат на прекини во снабдувањето во последните денови, забележува Ројтерс.
Владата, исто така, во среда објави дека планира да ослободи уште 36 милиони барели од стратешките резерви на нафта од почетокот на мај.
Јапонскиот премиер одби да одговори на прашањето дали членовите на AZEC+ побарале пристап до јапонските нафтени резерви по состанокот, нагласувајќи само дека договорот не вклучува ослободување на јапонските залихи и нема да влијае на домашните залихи.
The post Доларите доаѓаат: Јапонија го финансира снабдувањето со енергија appeared first on Во Центар.
Пронајдете не на следниве мрежи:
