Русија упати нова закана до Европската Унија, предупредувајќи дека евентуалното користење или запленување на руските замрзнати средства може да се сфати како „casus belli“, односно причина за војна. Дмитриј Медведев, заменик-претседател на Рускиот совет за безбедност и поранешен претседател на Русија, познат по своите радикални изјави, упати остра порака.
Медведев на руската платформа MAX изјави дека, доколку ЕУ одлучи за таканаречениот заем за репарација врз основа на руските средства блокирани во Белгија, таков потег би можел да се окарактеризира како „посебен вид изговор за војна, со сите последици што би произлегле од тоа за Брисел и поединечните членки на ЕУ“.
„Доколку одлучат да украдат руски средства, враќањето на тие средства нема да се случи преку судовите, туку преку реални репарации што ќе ги платат поразените непријатели на Русија“, додаде Медведев.
Европската комисија бара начин да ѝ помогне на Украина
Европската комисија разгледува модел според кој руските замрзнати средства, без формална конфискација, би се користеле како основа за финансиска поддршка на Украина. Во среда беше предложено да се воведе „заем за репарација“ за Киев, кој би се финансирал од салдото на европските институции кои ги држат руските државни средства блокирани од почетокот на инвазијата во 2022 година.
Планот предвидува отклучување на 90 милијарди евра, што претставува околу две третини од финансискиот јаз на Украина, кој Меѓународниот монетарен фонд го процени на повеќе од 136 милијарди долари за периодот 2026-2029 година. Досега, европските земји користеа само профит од замрзнатите средства, но сега се разгледува употребата на капиталот – потег што ја дели Унијата.
Белгија, каде што се наоѓа Euroclear – институцијата што го поседува најголемиот дел од рускиот државен имот – е особено претпазлива во однос на правните последици од можната употреба на капиталот, особено по завршувањето на војната. Функционерите истакнуваат дека земјите-членки треба да преземат заедничка одговорност.
Еден европски функционер изјави за CNBC дека одлуката за позајмување помош од ЕУ за Украина ќе бара едногласност. Сепак, користењето на замрзнатите руски средства би можело да се усвои со квалификувано мнозинство, што ја прави оваа опција политички полесна – но многу поризична.
Унгарија останува цврсто против понатамошно финансирање на Украина, што дополнително го комплицира донесувањето на заедничка одлука.
САД го засилуваат дипломатскиот притисок, разговорите не донесоа пробив
Додека во Брисел се дискутира за финансиите, меѓународниот дипломатски притисок околу Украина расте. Рустем Умеров, шеф на Советот за национална безбедност на Украина, во четврток во Мајами ќе се сретне со американскиот специјален претставник Стив Виткоф за да ги продолжат мировните консултации.
Во исто време, францускиот претседател Емануел Макрон е во Пекинг, каде што се среќава со кинескиот претседател Си Џинпинг. Се очекува Макрон да ја повика Кина посериозно да придонесе за решавање на украинската криза.
Претходните разговори меѓу руските и американските претставници, вклучително и состаноците со специјалниот американски преговарач Џаред Кушнер, не донесоа опиплив напредок. Американскиот претседател Доналд Трамп рече само дека преговорите биле „разумно добри“, но не даде повеќе детали за потенцијалниот документ што ќе ѝ биде презентиран на Москва.
Сè уште не е јасно за каков мировен план се дискутира, откако претходно беше објавено дека тајниот американско-руски документ од 28 точки е доставен до Украина.
The post Европа се соочува со тешка одлука, од Русија пристигна застрашувачка закана: „Ќе го земеме ова како причина за војна“ appeared first on Во Центар.
