Новиот комесар за одбрана на ЕУ сака да ги принуди земјите да складираат минимални количини муниција и други резерви, тврдејќи дека тоа е најдобриот начин да се зајакне „слабата одбранбена индустрија“ на блокот и да се подготват за идни војни. Андриус Кубилиус, поранешниот премиер на Литванија, кој наскоро треба да ја преземе функцијата комесар за одбрана, рече дека ЕУ мора да се подготви за можен руски напад во следните неколку години, пренесувва хрватски Индех.
Кубилиус подготвува одбранбен план и го спореди со плановите за складирање на природен гас, според кои земјите мора да имаат резерви и да ги споделуваат со другите земји-членки кога е потребно.
-Зошто немаме слични критериуми поврзани со воената безбедност, за да задржиме одредени количини артилериски гранати и други производи, да речеме експлозиви? – праша тој.
ЕУ се обиде да го зголеми производството на оружје откако Украина беше принудена да ја рационализира употребата на гранати и проектили додека ги одбиваше руските офанзиви во Украина. Финска, која граничи со Русија, е една од ретките земји-членки со големи залихи оружје, додека медиумите во Германија во 2022 година објавија дека нејзината армија ќе остане без муниција по само два дена борба.
Во март, ЕУ додели 500 милиони евра преку Законот за поддршка на муниција (ASAP) за зголемување на производствениот капацитет на 2 милиони гранати годишно до крајот на 2025 година.
Кубилиус рече дека тоа е подобрување на ограничувањето од 300.000 гранати годишно што беше на сила кога Русија го нападна Киев во 2022 година, но додаде дека е потребно повеќе:
-Ако сум во право, ние сè уште сме зад Русите.
Претседателката на Европската комисија, Урсула фон дер Лајен, рече дека ЕУ треба да потроши 500 милијарди евра за да го надомести недостигот во трошоците за одбрана.
Фон дер Лајен му даде на Кубилиус 100 дена по преземањето на функцијата да изработи Бела книга за одбранбената стратегија. Неговиот план треба да вклучува европски воздушен штит, кој би чинел стотици милијарди евра, и систем за сајбер одбрана, додаде таа.
Кубилиус сака земјите-членки на ЕУ заеднички да позајмуваат пари за овие проекти, но на оваа идеја во моментов се противат Германија и Холандија.
Тој, исто така, ќе претстави и други проекти од заеднички интерес што би можеле да добијат финансирање од ЕУ, вклучително и начини за поттикнување на одбранбените компании да соработуваат преку границите.
-Со цел да привлече приватен капитал, ЕУ ќе мора да ги промени правилата за инвестирање за да ги класифицира трошоците за одбрана како одржливи – рече Кубилиус.
Тој, исто така, ја истакна важноста на соработката со украинските производители на оружје, бидејќи беспилотните летала и ракетите го сменија начинот на кој се водат модерните војни:
-Тие имаат вистинско искуство на теренот.
Кубилиус предупреди дека нема време за губење, осврнувајќи се на оценката на Германија дека Русија може да биде подготвена да нападне членка на ЕУ до 2029 година.
Кубилиус рече дека плановите за одбранбената индустрија на ЕУ би можеле да го вклучат Обединетото Кралство, иако тоа повеќе не е членка на блокот.
-Ние ја сметаме Британија за дел од Европа – рече тој. „Демократските Европејци треба да бидат колку што е можно обединети. Гледам опасност во нашата слабост. А Путин би можел да се осмели да се впушти во нови авантури – додаде тој.
-И Кинезите гледаат. Кинезите ќе извлечат едноставен заклучок: Западот е прилично слаб. И покрај фактот што економската моќ на Западот е 25 пати поголема од онаа на Русија, ние не можеме да победиме. Која е причината? прашање на политичка волја – заклучи тој.
