Денеска заврши судењето на поранешниот лидер на ОВК, Хашим Тачи – обвинет за откривање на идентитетот на заштитени сведоци, како и за попречување на работата и непочитување на Специјалниот суд во Хаг; пресудата ќе биде изречена дополнително.

Во завршните зборови, обвинителите побараа казна затвор од шест години за Тачи, додека одбраната тврдеше дека неговата вина не е докажана во текот на постапката и побара судот да го ослободи од обвиненијата. Според обвинителството, доколку биде осуден, Тачи треба да ја отслужи оваа казна откако ќе ја заврши евентуалната казна што би му била изречена на 16 септември за воени злосторства извршени во Косово и Албанија во периодот 1998–1999 година.

Обвинението го товари Тачи (58) дека го открил идентитетот на шестмина заштитени сведоци од неговото главно судење за воени злосторства пред соработници кои го посетувале во притворот во Хаг во текот на летото и есента 2023 година, како и дека преку тие посетители им давал инструкции на сведоците како да сведочат.

Минатата недела, обвинителите побараа казни затвор од по три години за секој од сообвинетите – Фадил Фазлиу, Исни Килај и Башким Смакај – како и казна затвор од девет месеци за Хајредин Кучи.

Според обвинителството, тие го посетувале Тачи во притвор и потоа им ги пренесувале неговите инструкции за начинот на сведочење на самите сведоци. Според обвинителите, Тачи се обидел „да се спаси од осуда“ на судењето за воени злосторства во Косово и Албанија преку незаконско влијание врз сведоците.

На тоа претходно судење, обвинителите побараа казни затвор од по 45 години за Тачи и неговите сообвинети – Кадри Весели, Реџеп Селими и Јакуп Красниќи.

Во својот завршен збор на судењето за попречување на правдата кон крајот на минатата недела, главната обвинителка Кимберли Вест истакна дека Тачи, „соочен со веројатноста за долга затворска казна, се обидел да ја попречи постапката влијаејќи врз сведоците“ и дека бил „фатен во тоа дело врз основа на мноштво докази“.

Обвинителите во судницата пуштија снимки од разговори во кои Тачи го откривал идентитетот на заштитените сведоци пред своите сообвинети и давал инструкции за тоа како тие треба да сведочат.

„Соочен со обвиненија за воени злосторства, Тачи се обиде – преку своите сообвинети – да влијае врз сведоци за кои сметаше дека се клучни за исходот на неговото судење“, рече Вест.

Според обвинителите, меѓу овие сведоци биле и поранешните команданти на ОВК, Рустем Мустафа (познат како „Реми“) и Бислим Зирапи; кршејќи ги судските налози, Тачи ги користел посетителите за да им даде инструкции „да го обликуваат своето сведочење во согласност со наративот на Тачи“. „Тој даваше инструкции за тоа што сведоците треба или не треба да кажат, во обид да ја минимизира својата вина“ за воените злосторства, нагласи обвинителката. Целта беше да се „ублажи сликата за ОВК како организирана војска со Тачи во командна улога“, како и да се негира неговото присуство на местата на злосторствата наведени во обвинението.

Тачи, исто така, испратил порака до еден сведок – кој го идентификувал како присутен за време на малтретирањето што сведокот го претрпел од страна на ОВК – со инструкции да ја промени изјавата што претходно им ја дал на обвинителите во Хаг.

Додека бил во притвор, Тачи ги испечатил изјавите на сведоците и им дал копии на своите сообвинети, вклучувајќи и корекции во корист на неговата одбрана, кои се очекувало сведоците да ги прифатат.

Обвинителите подоцна ги пронашле овие изјави кај Киљај и Смакај за време на претресите спроведени на Косово.

Судењето започна кон крајот на февруари, а до почетокот на март, обвинителите веќе изведоа тројца сведоци пред судот.

Судијата Кристофер Госнел го сослуша сведочењето на еден сведок на одбраната на Тачи и прифати писмена изјава од друг.

Единствениот друг тим на одбраната што изведе докази беше оној на четвртообвинетиот, Киљај, кој достави писмени изјави од четворица сведоци за карактерот на обвинетиот.

Бранителите на Фазљиу, Смакај и Кучи одлучија да не изведуваат докази во одбрана, пренесе „Бета“.