Украинскиот претседател Володимир Зеленски денеска во украинскиот Парламент изјави дека војната против Русија е влезена во одлучувачка фаза и ги повика граѓаните на единство и издржливост и најави големо зголемување на производството на оружје.

Во едночасовниот говор по повод илјада дена од почетокот на руската инвазија, Зеленски рече дека Украина нема да се откаже од својот суверенитет или од правото на своја територија. Тој порача и дека нема да има нови избори додека не се постигне мир. – Во оваа фаза од војната се одлучува кој ќе надвладее – ние над непријателот или непријателот над Украинците… и Европејците и сите во светот кои сакаат да живеат слободно и да не бидат подредени на диктаторот, посочи украинскиот претседател.

Зеленски го претстави, како што рече, „планот за отпор“ на земјата, варијанта на „планот за победа“ што им го претстави на западните сојузници претходно оваа есен, и истакна дека Русија треба да биде принудена да преговара за завршување на војната со добра волја.

Иако рече дека целосните детали од планот ќе бидат објавени подоцна оваа година, тој откри дека тој вклучува чекори за стабилизирање на линијата на фронтот, поддршка на воените иновации и производството на оружје и мерки за зајакнување на националното единство и културниот идентитет.

„Единството е првата точка од нашиот внатрешен план за отпорот“, рече тој. Зеленски истакна дека Украина следната година ќе произведе најмалку 30.000 дронови со долг дострел.

Украина се обидува да го зголеми производството на оружје од почетокот на руската инвазија во февруари 2022 година, а Зеленски вели дека 40 странски производители на оружје веќе работат во одбранбениот сектор на Украина. Киев планира да произведе најмалку 3.000 крстосувачки ракети и „ракети беспилотни летала“, најави тој, без да даде временска рамка за тоа.