Ако прашате некого со што би сакал да го исполни најмногу своето секојдневие, очигледниот одговор на повеќето луѓе би бил – патување, патување, патување!
Да се патува значи да се вљубуваш одново во светските култури и уникатната убавина на секоја од многубројните дестинации кои ја красат планетата. Во модерното дигитално време, „скролајќи“, постојано им се воодушевуваме на видеата на травел-инфлуенсерите на социјалните мрежи, притоа додавајќи го секое „новооткриено“ место, во личната bucket листа за тоа што сѐ треба да посетиме барем еднаш во животот.
Едноставно, речиси и не постои човек кој нема желба да патува и да го истражи светот. А, кога ќе се помисли на најубавите и најомилени земји за патување, не може, а да не се спомене единствената bella Италија.
Италија е врвна туристичка дестинација за која не е потребен вовед. Но, што е тоа што ја прави толку посебна? Прилично е тешко да се најде подобра земја за посета, која е толку различна, повеќеслојна и богата со незаменлива историја и вкусови. Највозбудливото нешто за оваа земја е тоа што буквално секој посетител може да најде нешто што би го заинтересирало, од богата култура, до природни убавини, антички руини, величествени планински региони, огромно крајбрежје и дефинитивно одличната медитеранско-италијанска кујна. Ова се само дел од причините зошто оваа земја е топ-дестинација за секој кој сака да патува, паралелно уживајќи многу со сите сетила. Всушност, не многу, туку најмногу!
Кога зборуваме за хранaта, италијанската кујна изобилува со прекрасни и ретки јадења, кои се топат со секој вкусен залак, внимателно подготвени според семејни рецепти, стари и по стотици години, без разлика дали се работи за најдобро чуваната тајна за совршената пица или, пак, за паста подготвена со најквалитетен италијански пармезан, сето тоа во комбинација со вино одлежано во винарска визба во Тоскана.
Веќе го замисливте вкусот, нели?
Јавна тајна е дека Италија може да се пофали со едно од најдобрите црвени вина во светот. Луѓе од целиот свет патуваат само за да ги пробаат вината од регионите Кијанти, Ломбардија и Пиемонт.
Италија е дом на 55 локалитети кои се наоѓаат на листата на светското наследство на УНЕСКО, повеќе од која било држава во Европа. 50 од овие знаменитости се културни и 5 од нив се природни. Кога се зборува за знаменитости, Италија изобилува со убави цркви и музеи, кои едноставно се премногу добри ремек-дела за да се занемарат и одминат. Всушност, не можете да се шетате низ Италија без да ги посетите познатите локалитети, кои се и дел од синонимите за оваа земја што го краси центарот на Медитеранот. Малите места, како Фиренца, кои во изминатите векови биле водени од благороднички семејства, со сигурност ќе ве одведат на еден ролеркостер и ќе почнете да се чувствувате како археолог.
Кога се во прашање природните убавини, на Италија ѝ нема конкуренција. Земјата е благословена со природна убавина, од издигнатите планини на север, до живописните езера и најдолгото крајбрежје во Европа. Целата држава изобилува со прекрасни глетки, кои ќе ве остават без здив.
И италијанските градови се неминовно легендарни, односно нудат антички богатства достапни да се искусат од една модерна перспектива, кои ги прават уникатни и прекрасни во исто време. Најпознати градови во Италија, кои им пркосат на вековите, се Венеција, Рим, Каљари, Сиена, Фиренца, Наполи, Џенова, Милано и Палермо, сите уникатни на свој начин.
Одговорот на прашањето: „Зошто Италија е засекогаш tantissimo најубава?“, е спојот на културата, природата и храната кои оваа земја ги нуди, а речиси да не постои човек кој би одолеал на кое било од тие национални богатства. Но, која е главната причина? Тоа се насмевките и љубовта кон животот на Италијанците, медитерански менталитет вреден да го инспирира светот.
Пронајдете не на следниве мрежи:
