Додека работите на компјутер, особено кон крајот на работниот ден, може да забележите дека вашето тело полека ја зазема типичната згрбавена положба. Иако оваа положба е често предмет на шеги и мемиња на интернет, експертите предупредуваат дека тоа не е безопасна навика. Ако редовно седите згрбавени над вашиот компјутер или телефон, тоа може да го оштети и вашето физичко и ментално здравје на долг рок, пишува HuffPost .
„Ако постојано сте згрбавени над нешто, си правите лоша услуга“, вели Алан Хеџ, експерт за ергономија и почесен професор на Универзитетот Корнел.
„Премногу ги оптоварувате мускулите на грбот додека вашето тело се наведнува напред. Исто така, го отежнува дишењето и ја забавува циркулацијата.“
Колку подолго седиме згрбавени додека работиме, толку повеќе нашите тела ја плаќаат цената.
„Со текот на времето, проблемите стануваат поизразени и на крајот можат да се развијат во посериозни проблеми – во вратот, грбот, колковите, па дури и во раката, зглобот и лактот“, објаснува Хеџ, наведувајќи го како пример синдромот на карпален тунел (кој се јавува кога медијалниот нерв во зглобот се компресира во тесен „карпален тунел“, предизвикувајќи пецкање, вкочанетост, болка и слабост во раката и прстите – особено палецот, показалецот и средниот прст).
Што им прави седењето згрбавено на телото и мозокот
Првиот знак дека оваа положба ви штети е често вкочанетоста и непријатноста.
„Можеби ќе забележите дека ги триете зглобовите или дека ништо не ви е пријатно. Не го игнорирајте тоа – непријатноста е првиот знак дека нешто не е во ред“, истакнува Хеџ.
Со текот на времето, лошото држење на телото може да доведе до болка.
,,Седењето згрбавено може да предизвика сериозни проблеми со вратот, грбот и рамената. Покрај болката, може да почувствувате и слабост во горниот дел од грбот, вкочанетост на зглобовите, па дури и хернија на дисковите во ‘рбетот“, вели Карен Лоесинг, сопственичка на „Ергономски експерт“, компанија која обезбедува ергономски проценки за бизниси.
,,Неприродните положби исто така можат да предизвикаат вкочанетост, пецкање и болка од притисок врз нервите.“
Влијае на варењето
Проблемите не запираат само кај мускулите и зглобовите. Лошото држење на телото може да влијае и на варењето на храната. Лоесинг објаснува дека седењето згрбавено врши притисок врз абдоминалните органи и го отежнува варењето на храната, што може да доведе до рефлукс, надуеност и запек.
„Кога стомакот е постојано компресиран, на телото му е потешко ефикасно да ја вари храната“, додава таа.
Покрај физичките заболувања, последиците се чувствуваат и на ментално ниво. Постојаната непријатност, главоболките и болките во вратот го отежнуваат концентрирањето. „Станува многу потешко да се размислува јасно“, предупредува Хеџ.
,,Кога чувствувате болка, тоа е постојано одвлекување на вниманието.“
Со текот на времето, оваа исцрпеност води до замор и повеќе грешки на работа.
,,Кога сме уморни, грешките се зголемуваат, а нашата способност за донесување одлуки опаѓа“, вели Хеџ.
Како да избегнете постојано седење згрбавено
За да избегнете згрбување, важно е да ја намалите напнатоста во вашето тело и да се осигурате дека грбот ви е добро потпрен. Кога се потпирате на грбот од стол, вашето тело природно зазема поздрава положба. Вашиот грб е потпрен, дел од тежината се симнува од колковите и дишењето станува полесно, објаснува Хеџ.
Затоа е важно да имате квалитетна канцелариска столица со потпирач за грб и да ја прилагодите на вашата висина. Ако работите на лаптоп, се препорачува да користите држач за лаптоп и посебна тастатура. На овој начин можете да го подигнете екранот на вистинската висина и да избегнете наведнување напред.
Лоесинг нагласува дека висината на мониторот е клучна за држењето на телото. Ако е прениска, ќе се згрбавите. Ако е превисока, ќе го напрегнете вратот. Горниот раб на мониторот треба да биде во висина на очите. Повлечете ги рамената малку назад и опуштете ги.
Ако се најдете згрбавени додека го користите телефонот, кренете го во висина на очите или потпрете ги лактите на маса или покрај телото за да го намалите напрегањето на вратот и рамената.
Иако е потребно време за да се навикнете на овие промени, на долг рок тие се многу подобар избор отколку години згрбавено седење што доведува до болка и хронична непријатност. Вашето тело дефинитивно ќе ја почувствува разликата.
The post Зошто седењето згрбавено е поопасно отколку што мислите appeared first on Во Центар.
