Изложба на Горан Боев
На 28 март 2025 година, во 19:00 часот, во Културно Информативниот Центар – Скопје, ќе се одржи отворањето на изложбата “Од спомени до боја: Горан Боев и патот до искреното сликарство”, во организација на Музеј-Галерија Кавадарци, со поддршка од Министерството за култура и туризам. Овој настан ќе ги претстави најновите уметнички дела на Горан Боев, академски сликар и еден од најталентираните македонски уметници.
Во најновиот циклус на дела, Боев ја истражува суштината на сликарството и самиот себеси, откривајќи како уметноста му помага да емитира искрена емоција низ богатата палета на македонските бои и традиции. Тој се фокусира на поедноставување на формата за да ја постигне суштината, воден од личната емоција и животните искуства. Како што самиот вели, преку своето сликарство, настојува да ги отелотвори најискрените чувства и сеќавањата, прикажувајќи ги своите внатрешни траги и рани.
Боев, роден на 1 ноември 1982 година во Кавадарци, завршил средно училиште за применета уметност во Скопје, по што дипломирал на Факултетот за Ликовни Уметности. Работел како асистент и професор по ликовно образование во разни институции, а во меѓувреме бил и зограф иконописец во Бигорскиот манастир. Неговите дела се претставувани на голем број самостојни и групни изложби во Македонија и странство, а добитник е и на признанија како „Почесен граѓанин на град Кавадарци“ и „Франк Манинг“ за најдобар студент. Боев поттикнува размислување не само за уметноста, туку и за суштината на личното постоење, поставувајќи ги своите чувства и идеи отворено пред публиката.
The post Изложбата на Горан Боев денеска во КИЦ – Скопје appeared first on 365.mk.
