Конфликтот на Блискиот Исток продолжува и денеска, бидејќи Израел рано утринава го бомбардираше центарот на Бејрут, при што загинаа најмалку шест лица.

Израелските сили претходно го претрпеа најсмртоносниот ден на либанскиот фронт во една година конфликт со исламистичката група Хезболах, поддржана од Иран.

Израел соопшти дека извршил прецизен воздушен напад врз Бејрут. Очевидци на Ројтерс велат дека виделе голема експлозија, а безбедносните сили велат дека целта била зграда во централниот бејрутски кварт Бахур, во близина на зградата на парламентот.

Најмалку шест лица загинаа, а седум се ранети, соопштија либанските здравствени власти.

Три проектили го погодија и јужното предградие Дахија, каде минатата недела беше убиен лидерот на Хезболах Хасан Насрала.

Еден ден откако Иран истрела повеќе од 180 ракети врз Израел, Израел во средата соопшти дека изгубил осум војници во копнените судири во јужен Либан, кога неговите сили навлегле на територијата на северниот сосед.

Американскиот претседател Џо Бајден во средата остро ги осуди нападите на Иран врз Израел, но рече дека „нема да поддржи израелски напад врз иранските нуклеарни постројки“.

„Одговорот е не“, рече Бајден на прашањето за можноста Израел да се одмазди на локациите поврзани со иранската нуклеарна програма.