Социјалната мрежа TikTok често придонесува за ненадеен пораст на популарноста на одредени книги. Неодамна беше забележан неочекуван тренд: делата на Фјодор Достоевски, а посебно внимание привлече новелата „Бели ноќи“ која беше објавена во 1848 година, а сега повторно стана исклучително популарна кај помладата публика.Според податоците, изданието Penguin Classics на „Бели ноќи“ годинава го зазеде четвртото место меѓу најпродаваните преведени книжевни дела во Обединетото Кралство.Ејми Рајт од книжарницата Причардс во Ливерпул рече дека порано ретко ја продавале книгата, но во последните две години забележале значително зголемување на интересот.– Имаме вработен кој работи овде 25 години и рече дека повремено ќе продаваме неколку примероци од оваа книга. Но, во последните две години дефинитивно видовме зголемување – изјави Ејми.Слично на тоа, Френсис Клевердон од книжарницата „Хачардс Пикадили“ во Лондон истакна дека минатата година продале 190 примероци од изданието, што е значително зголемување во однос на претходниот период.Од декември минатата година, „Бели ноќи“ станаа вирални на платформи како BookTalk и Bookstagram. Корисниците споделуваат критики, цитати и фотографии од книгата, често со шолја кафе, а создадени се плејлисти на Spotify инспирирани од делото, со композиции од Чајковски и Шостакович.Многумина истакнуваат дека убавата љубовна приказна од книгата длабоко ги трогнала.Една од причините за оваа популарност може да биде должината на новелата, нешто повеќе од 80 страници, што ја прави достапна за брзо читање и додавање на списоците на книги прочитани во текот на годината.– „Бели ноќи“ ме привлече делумно затоа што е кратка – рече лондонската Ели Хаулет, која пишува за книгите на TikTok како @ellisrubyreads.Исто така, приказната за еден осамен млад човек и неговата средба со Настењка, која ја чека нејзината вистинска љубов, одекнува во емоциите на многу читатели, особено во време кога темите на осаменоста и невозвратената љубов се општо препознаени.Овој тренд покажува како социјалните мрежи можат да го ревитализираат интересот за класичната литература, доближувајќи ја до новите генерации и потсетувајќи на безвременоста на темите со кои се занимава.