Портпаролката на СДСМ, Богданка Кузеска на денешната прес-конференција кажа дека со сомневаат во судир на интереси по одлуката на ДКСК поврзана со директорот на АНБ, Бојан Христовски и неговата спорна диплома.
Според нив алармантно е откритието дека членката на ДКСК, која била задолжена за овој случај и реферираше дека „сè е во ред“ со дипломата на Христовски, истовремено е предавач на Универзитетот за туризам и менаџмент во Скопје – институцијата која ја издала спорната диплома.
„Со пријава до ДКСК оспорена е диплома од Универзитетот на кој Ристовска била професорка во време кога Христовски дипломирал во рок од една година. Ова претставува уште еден основ за директен судир на интереси, што е во спротивност со Етичкиот кодекс на ДКСК, каде што јасно е наведено дека членовите не смеат да одлучуваат за предмети каде постои судир на интереси (член 9).
Не смее да има ниту најмал сомнеж за конфликт на интерес кај оние што треба да се борат против конфликт на интерес. Ристовска требало да биде изземена од овој случај. ДКСК треба да биде пример а не да остава впечаток дека штити било кого. Пиши-бриши постапките на Универзитетот за туризам и менаџмент дополнително ги подгреваат сомнежите дека намерата е нешто да се сокрие од јавноста. Ако се било чисто, зошто по објавувањето на информациите во медиумите за судир на интереси Ристовска беше избришана од составот на универзитетскиот кадар?
За вчера повторно да биде вратена на интеренет страната на Универзитетот“, кажа Кузеска.
Таа повтори дека СДСМ бара итно оставка на Цвета Ристовска од Државната комисија за спречување на корупцијата, поради судир на интереси кој ја загрозува кредибилноста на ДКСК.
„Повлекување и преиспитување на одлуката за случајот со дипломата на директорот на АНБ. Расчистување на прашањето за евентуалните неправилности во анализата на Државниот просветен инспекторат. Институциите мора да работат во интерес на граѓаните и со највисок интегритет. Судирите на интереси, манипулациите и злоупотребите мора да бидат санкционирани“, посочи Кузеска.