– Пратеничката група на Левицата ќе поднесе до Парламентот предлог-закон за укинување на дискреционото право на директорите во јавните здравствени установи за време на вработувањето. Со оваа иницијатива е предвидено најдобро рангираните кандидати да бидат избрани преку транспарентни конкурси, со јасни, мерливи и проверливи критериуми.
Според Левица, овој предлог-закон е неопходен чекор за елиминирање на старите практики на непотизам, партизирање и клиентелизам, преку наметнување на почитување на ранг-листите и објективните критериуми при вработувањето.
„Јавното здравство со децении е оптоварено со системски непотизам, партизирање и клиентелизам, каде што семејните врски и партиската припадност се вреднуваат повеќе од професионализмот и интегритетот. Дискреционото право на директорите е трансформирано во институционален механизам за репродукција на привилегии, претворајќи го јавното здравство во затворен систем на партиско и наследено вработување“, се наведува во соопштението на Левица.
Како резултат на овие политики, според нив, најквалификуваните и највисоко рангираните вработени систематски се исклучуваат од јавниот сектор и се принудени да ја продолжат својата кариера во приватни клиники или во странство. Ова, според Левица, претставува сериозен удар врз јавното здравство, бидејќи државата инвестира во образованието на здравствените работници, додека бенефициите ги добиваат приватни структури, странски земји или други сектори. Во исто време, Фондот за здравствено осигурување се соочува со дополнителни трошоци за третмани во приватни клиники и во странство, додека пациентите честопати се принудени да продаваат средства за да се излекуваат. Левица ги повикува сите пратеници да го поддржат предлог-законот и да застанат на страната на јавниот интерес, здравствените работници и пациентите.
The post „Левица“ предлага закон против непотизам и партизација во здравството appeared first on Во Центар.
Пронајдете не на следниве мрежи:
