Во однос на локалните избори, претседателот на Собранието, Африм Гаши денеска рече дека најдоцна до крајот на јули и почетокот на август тие би се распишале. Дотогаш има доволно време да поминат измените во Изборниот законик по барање на ОБСЕ.

Коментирајќи ја можноста некои од законите што се однесуваат на изборите да не се донесат навреме, тој рече дека ако се случи тоа ќе одат на избори со старите решенија.

Образложувајќи ги активностите на Собранието во следниот период, посочи дека е предвидено да се одржи и јавна расправа околу измените на Законот за локална самоуправа што веќе некое време се најавуваат од Министерството за локална самоуправа.

Претседателот на Собранието рече и дека се очекува на следната пленарна седница, која треба да се одржи на 29 април, да биде ставена интерпелацијата за министерот за внатрешни работи Панче Тошковски, поднесена од пратеничката група на Левица.

За евроинтеграциите, кажа дека се одвива интензивна парламентарна дипломатија за почеток на преговорите, но и за да немаме натамошни блокади на патот по однос на идентитетските прашања.