Во Универзитетската клиника за трауматологија, ортопедски болести, анестезија, реанимација, интензивна нега и ургентен центар (TOARILUC), за првпат во Македонија, беше извршена сложена хируршка интервенција кај 4-годишно дете со ретка конгенитална деформација – Шпренгел деформитет, во соработка со проф. д-р Уфук Ајдинли од Република Турција.
Оваа интервенција претставува важен чекор во зајакнувањето на капацитетите на македонскиот здравствен систем за третман на ретки и сложени ортопедски состојби во педијатриската возраст, преку тимска работа, трансфер на знаење и имплементација на современи оперативни техники.
„Оваа интервенција е резултат на мултидисциплинарна координација на високо ниво – ортопедски тим, анестезија, интензивна нега и итна поддршка – со јасен фокус на безбедноста и квалитетот на процедурата. Благодарение на соработката со проф. д-р Уфук Ајдинли, направивме важен чекор напред во третманот на ретки вродени деформитети кај децата. Нашата цел е овие видови процедури да станат стандарден дел од клиничката пракса во земјата, преку континуирана едукација и развој на локалните тимови“, – нагласува директорот на ТОАРИЛУЦ, проф. д-р Игор Мерџаноски.
Според министерот за здравство, Азир Алиу, градењето доверба во здравствениот систем се постигнува преку конкретни резултати, знаење, тимска работа и создавање услови дури и најсложените интервенции да се извршуваат во земјата.
„Ова е пример за тоа како меѓународната соработка, размената на искуства и знаења директно се преведуваат во подобра грижа за пациентите. Министерството ќе продолжи да ја поддржува модернизацијата на клиниките, развојот на човечките ресурси и воведувањето современи медицински методи, со цел граѓаните да имаат современ, функционален и одржлив здравствен систем“, рече министерот Алиу.
Шпренгеловиот деформитет е ретка конгенитална состојба кај која скапулата (лопатката) е абнормално позиционирана повисоко и е неразвиена, што е резултат на неуспешна миграција надолу за време на ембрионалниот развој. Оваа состојба обично предизвикува забележливо „испакнување“ и ограничување на движењето на рамото.
Често се поврзува со други состојби, како што се Клипел-Фајл синдромот, сколиозата, а понекогаш и со дополнителни коскени или фиброзни врски со ‘рбетот (омовертебрален појас). Поради оваа причина, за точна дијагноза и соодветно планирање се користат испитувања како што се КТ и/или МРИ. Хируршкиот третман обично е резервиран за најтешките случаи кај деца на возраст од 3 до 8 години, со цел подобрување на функцијата и физичкиот изглед.
The post Министерство за здравство: За првпат е извршена хируршка интервенција кај дете со ретка вродена деформација appeared first on Во Центар.
