Премирот Христијан Мицкоски не гледа институционален, ниту било каков пропуст во врска со бегството на ексвицепремиерот и висок функционер на ДУИ, Артан Груби, како и за актуелната недостапност на поранешниот директор на ЕСМ, Васко Ковачевски.

Според Мицкоски, прашање на време е кога овие, како што ги нарече, бегалци од правдата, ќе се вратат во земјава и ќе одговараат за кривичните дела кои им се ставаат на товар.

-Затоа што знаете, да сте бегалец од правдата не е така едноставен живот, па дури и да го смените континентот. Така што мислам дека таа работа нема така да заврши. Прашање на време е кога овие бегалци од правдата ќе се соочат со истата – изјави тој.

Прашан на што го темели оптимизмот дека Груби и Ковачевски ќе се вратат во државата, премиерот беше краток во одговорот, велејќи дека тоа го покажува искуството, но и дека има такво чувство.

-(Оптимизмот) го темелам на искуството коешто вели дека правдата е спора, но секогаш доаѓа. Порано или подоцна. Не мислам дека ќе има исклучок и во овој случај. Имам такво чувство. Да видиме дали чувството ме лаже или не – порача Мицкоски.