НАСА потврди дека ќе соработува со компанијата „СпејсЕкс“, која е во сопственост на американскиот милијардер Илон Маск, за враќање на двајца нејзини астронаути од Меѓународната вселенска станица (МВС) на Земјата, нагласувајќи дека тоа ќе биде направено што е можно поскоро.

Претходно, американскиот претседател Доналд Трамп објави дека побарал од Маск и неговата компанија да помогнат во враќањето на двајца астронаути од МВС, пренесува „Ројтерс“.

„Ги замолив Илон Маск и „СпејсЕкс“ да вратат двајца храбри астронаути кои администрацијата на Бајден ефикасно ги напушти во вселената. Илон ќе замине наскоро. Се надевам дека сè е безбедно. Со среќа“, напиша Трамп на неговата социјалната мрежа, а Маск потврди дека добил такво барање од претседателот.

Астронаутите на НАСА, Буч Вилмор и Сани Вилијамс, требаше да се вратат во капсула „СпејсЕкс“уште во август.

Двајцата летаа до МВС со вселенскиот брод „Боинг Старлајнер“ минатото лето, но нивната мисија, наместо планираните осум дена, беше продолжена на речиси една година поради проблеми со системите на леталото, па двајцата вршат научно истражување на МВС.

НАСА соопшти дека тие се во добра здравствена состојба.

Сè уште не се познати сите детали за тоа кога точно ќе се вратат астронаутите.