„Бинанс“, најголемата крипто берза во светот, веројатно ќе ја изгуби лиценцата за обезбедување услуги на клиенти во Европската Унија од следниот месец, бидејќи нејзиното барање за лиценца веројатно ќе биде одбиено, пишува „Ројтерс“.
Според новите правила на ЕУ, познати како MiCA, крипто компаниите имаат рок до крајот на јуни да добијат лиценца што им овозможува да продолжат да им обезбедуваат услуги на клиентите низ целата Унија. Барањето на Binance, поднесено до регулаторот на капиталните пазари на Грција, треба да биде одбиено.
Со години, европските регулатори се обидуваат да го зајакнат надзорот врз крипто берзите, кои овозможуваат тргување со криптовалути како што е биткоинот низ целиот свет.
Според правилата на MiCA, крипто компаниите мора да аплицираат за лиценца до регулаторите во поединечните земји-членки на ЕУ, а потоа можат да ја користат таа лиценца како еден вид „пасош“ за да работат во сите 27 земји-членки.
Проблемот е во надзорот на крипто-индустријата вредна повеќе трилиони долари, за која регулаторите долго време предупредуваат дека може да ги дестабилизира финансиските пазари и да им наштети на инвеститорите доколку не се следи соодветно.
Одбивањето на апликацијата во Грција би значело дека Binance нема да добие зелено светло за работа во ЕУ, оставајќи ја неизвесна иднината на корисниците на Binance со седиште во земјите-членки на ЕУ.
Портпаролот на Binance, кој има 300 милиони корисници ширум светот, претходно изјави дека компанијата активно работи на добивање на MiCA лиценца и соработува со регулаторите веќе 18 месеци.
Според него, Binance верува дека ги исполнува условите за добивање одобрение од MiCA. Тој исто така наведува дека разбира оти Грчката комисија за капитални пазари го завршила прегледот на апликацијата и утврдила дека е во согласност со прописите.
Ричард Тенг, ко-извршниот директор на „Бајнанс“, изјави во февруари дека работната сила и безбедносниот профил на Грција ѝ даваат предност на земјата во однос на поголемите финансиски центри кога станува збор за избор на регулаторно седиште на компанијата во Европа.
Неговиот претходник и основач на „Бајнанс“, Чангпенг Жао, познат како ЦЗ, беше помилуван од претседателот на Соединетите Американски Држави, Доналд Трамп, откако се изјасни за виновен за кршење на американските закони против перење пари.
The post Најголемата берза за криптовалути „Бинанс“ ги прекинува операциите во Европската Унија: Се соочува со губење на лиценцата appeared first on Во Центар.
