„Чанаккале 1915“, нов висечки мост на Дарданелите, наскоро ќе биде отворен за сообраќај и ќе ги поврзува Европа и Азија, потврдија турските власти.
Претседателот на одборот на директори на компанијата Limak Holding, која го изгради мостот, Ебру Оздемир, изјави дека проектот е успешно завршен.
„Го известивме Министерството за транспорт дека сме подготвени. Сега сме во завршна фаза на подготовки и го чекаме датумот на отворање на мостот“, рече Оздемир. Додаде дека мостот можел да биде отворен пред три месеци доколку немаше проблеми со работниците поради пандемијата на коронавирусот.
Првично се проценуваше дека изградбата на мостот ќе чини 2,8 милијарди долари, но Оздемир рече дека цената е повисока за околу 300 милиони долари поради зголемувањето на цените поради пандемијата и проблемите во синџирот на снабдување.
Мостот „Чанаккале 1915“ е долг 4,6 километри и го има најдолгиот среден распон во светот од 2.023 метри, а воедно е и најдолгиот висечки мост во светот. Овој мост претставува важна врска помеѓу Европа и Азија.
Изградбата започна во март 2017 година, а официјалното отворање е планирано за 18 март годинава. Мостот е дел од проектот „Vision 2023“, кој има за цел да го зголеми капацитетот за патен, железнички и поморски транспорт на Турција, а е поврзан со автопатот Малкара-Чанаккале и ќе биде најважниот дел од трасата долга 101 километар. Кога ќе се формира синџирот на автопати околу Мраморното Море по завршувањето на проектот, тоа во голема мера ќе го подобри протокот на сообраќај и ќе ги ублажи проблемите со застојот.
Елементите на мостот „Чанаккале“ беа дизајнирани како артилериски гранати во чест на познатата битка кај Галиполи во Првата светска војна, а неговиот рекорден просечен дострел од 2.023 метри се однесува на 100-годишнината од основањето на Република Турција, која земјата ја слави следната година.
