На седница на грчката Влада кавга меѓу Каменос и Коѕијас

Според тврдењата на грчките медиуми несогласувањата меѓу министрите за одбрана и за надворешни работи на Грција, Панос Каменос и Никос Коѕијас, за време на денешната владина седница се претвориле во расправија. Причината биле изјавите на Каменос во САД на кои реагирал Коѕијас.
Како што јави дописничката на МИА од Атина, според дел од грчките медиуми, на министерскиот состанокот, што се одржуваше зад затворени врати, шефот на грчката дипломатија упатил критики до Каменос дека со неговите изјави го прекршува договорот меѓу коалициските партнери во грчката Влада и ја поткопува националната позиција во прашањето за името, посочувајќи му дека водењето на надворешната политика не е во негова надлежност.
Каменос, според грчката новинска агенција АНА-МПА, го повторил неговиот став во однос на прашањето за името, но истакнал дека нема да се приклучи во обидот на “Нова демократија“ за уривање на Владата, а со слични ставови биле и останатите министри од редовите на неговата партија “Независни Грци“.
Извори од партијата за АНА-МПА, рекле дека Независни Грци „во никој случај нема да се идентификуваат со Нова демократија и нивните планови за уривање на Владата“, но и дека не се менува позицијата на партијата за Договорот од Преспа.
Министерката за туризам Елена Кундура, која доаѓа од редовите на “Независни Грци“, на Твитер објави дека на владината седница изјавила дека ја поддржува Владата да го заврши нејзиното дело и дека секогаш гласа според нејзината совест.

 

Пронајдете не на следниве мрежи:©ПУЛС24.МК Вестите на интернет страницата на редакцијата ПУЛС24.МК може да се користат исклучиво за лично информирање. Без писмена дозвола од ПУЛС24.МК или посебен договор, не е дозволено преземање, користење или реемитување на вестите.