Глобалната енергетска криза би можела дополнително да се продлабочи откако Иран предупреди дека ќе блокира поморски рути низ Ормускиот Теснец кои не се одобрени од иранските власти.

Според Ројтерс, новите предупредувања предизвикале сериозна загриженост кај бродските оператори, осигурителните компании и трговците со нафта.

Заканите доаѓаат по серија напади врз танкери, при што минатата недела бил забележан најголемиот број напади во една недела од почетокот на војната со Иран.

Податоците објавени на 8 октомври покажуваат дека бројот на бродови што поминуваат низ Ормускиот Теснец се намалил на најниско ниво во повеќе од два месеца.

Ова е особено загрижувачко бидејќи теснецот претставува една од најважните поморски точки за светската трговија со енергенси.

Дури и без целосно затворање, постојаните закани можат да предизвикаат сериозни економски последици.

Бродските компании мора да проценуваат дали ризикот од напад е прифатлив, осигурителните премии можат да растат, а дел од танкерите да го одложуваат пловењето.

Последиците веќе се чувствуваат на светските берзи. Нафтата забележа силен раст на 8 октомври, поттикнат од стравувањата за снабдувањето од Блискиот Исток.

Дополнителен проблем е што земјите увознички не можат лесно да ги заменат испораките од Персискиот Залив.

За Европа, Азија и земјите од Балканот, продолжувањето на ваквата ситуација би можело да значи повисоки цени на горивата, поскап транспорт и дополнителен инфлаторен притисок.

Најголемата опасност не е само физичкото затворање на теснецот, туку можноста стравот од напади постепено да го парализира транспортот.