Ниту ние сме имале детство како нашите родители, ниту нашите деца некогаш ќе знаат какво сме имале ние. Можеме само да им раскажуваме.
Секое време си носи свои убавини, поради кои или им завидуваме на родителите или пак, сакаме да живееме во модерно време, како тоа што го прават денешните млади луѓе.
Секоја генерација си има свои карактеристики, но и навики кои ги практикувала некогаш, но не може да ги употреби во денешно време, од очигледни причини.
Еве какви беа викенд-ритуалите на генерациите родени од 1980-та, па до 1995-та, кога интернетот и технологијата не беа во подем.
1. Никој не знае што сте правеле за викенд
Освен ако не сте договорени со нив, школските другарчиња не знаат што сте правеле за викенд, сè до понеделник, кога споделувате каде сте биле со родителите и роднините.
2. Испланирана комуникација
„Јави ми се околу 12, дома ќе бидам“. Во денешно време, со мобилните телефони, не мора да се договарате, бидејќи сте достапни каде и да сте.
3. Гледавте филмови на телевизија
Во кината немаше проекции секој ден, ниту пак можевте да се претплатите на Нетфликс, ниту да симнувате торенти. Телевизијата беше единствена опција за гледање филмови, евентуално видеотека.
4. Имавте шифри и измислени јазици со пријателите
Кога фиксниот телефон стоеше во дневната соба или во ходникот, единствено што можевте да направите е да ги шифрирате разговорите, за да звучат наивно и несомнително.
5. Новите хитови ги слушавте на радио, спотовите на MTV и VIVA
Дека омилениот пејач има нова песна, дознававте ако го начекате спотот на некој од музичките канали. Потоа можевте да го купите албумот, најчесто касета, и да ја „вртите“ омилената песна.
6. Семејни ритуали за викенд
Ги гледавте спортските натпревари кои ги имаше на неколкуте ТВ-канали, игравте пукање патки на Нинтендо, „ѕиркавте“ по нешто од филмовите што ги гледаа родителите и ви беше крајно здодевно кога гледаа вести.
7. Недела е ден за одмор
Во сабота ве шетаа по паркови и игралишта, а во недела, се знае, семеен ручек, бањање и легнување рано, бидејќи утре сте на училиште, а родителите на работа.
8. Јавување во „непристојно“ време
Родителите не ви дозволуваа да телефонирате за време на ручек и вечера, а коментираа гласно дека е непристојно, доколку заѕвонеше телефонот кај вас дома.
