Основното јавно обвинителство во Скопје објавува дека предложило да му се изрече куќен притвор на Артан Груби, како осомничен во случајот „Државна лотарија“.
Обвинителството вели дека откако Груби доброволно се појавил пред властите и откако биле обезбедени поголемиот дел од доказите, предложило неговиот притвор да се замени со куќен притвор.
„Основното јавно обвинителство во Скопје, по добиеното известување дека второосомничениот во случајот Државна лотарија, каде што е осомничен заедно со уште пет лица, доброволно се јавил на органите на прогонот и изразил подготвеност за соработка со надлежните органи, ќе ја продолжи постапката против него со цел донесување обвинителска одлука“.
„На барање на второосомничениот преку неговата одбрана, денес тој се појави пред надлежниот обвинител, каде што ги разгледа списите на предметот, но поради големиот обем на доказен материјал, прегледот ќе продолжи во наредните денови, по што второосомничениот ќе може да ја изнесе својата одбрана“.
„Во врска со мерките за обезбедување присуство на второосомничениот во продолжението на постапката, Основното јавно обвинителство во Скопјe предложи замена на мерката притвор со мерка куќен притвор и одземање на неговата патна исправа, имајќи го предвид фактот дека поголемиот дел од доказите се прибавени во текот на постапката, дека тој доброволно се пријавил на органите на прогонот и дека постојат индиции дека неговата лична безбедност не може да се гарантира во притворската единица, индиции кои се поткрепени со известувања од надлежните органи. Исто така, индициите за загрозување на неговата безбедност се однесуваат и на членовите на неговото семејство“, соопшти Обвинителството.
