Светиот месец Рамазан за верниците од муслиманската вероисповед започнува денес каде што според заповедите на светата книга на исламот, Куранот, верниците се обврзани да постат во текот на денот.
Постот на муслиманите започнува на изгрејсонце, и трае до првиот момент на целосното зајдување на сонцето.
Месец Рамазан е деветти месец од лунарниот календар по којшто муслиманите го сметаат времето почнувајќи од големото преселување „Хиџретот“ на пророкот Мухамед од градот Мека во градот Медина во 622 година н.е., заедно со првите верници на исламската вера.
Обврската за постот за муслиманските верници дошла 2 години после Хиџретот, односно во 624 година н.е. каде што во Куранот Алах заповедал дека постот е должност за сите верници на исламот.
„Верници, постот е ваша должност, како што беше должност и за верниците пред вас. Благодарение на тоа ќе се заштитувате себеси од лошото“, пишува во Куранот.
