Деновиве од печат излезе романот „Фауна“ од канадската писателка Кристијан Вадне, како 211 книга во едицијата „ПРОаЗА“ на издавачката куќа ИЛИ-ИЛИ. Преводот од француски на македонски јазик е на Валентина Новачева, а дизајнот на корицата на Марија Смилевска.
„Фауна“ е романот кој ја доби наградата за креативно пишување на градот Квебек и Саемот на книга „Интернационален Квебек“ во 2019 година, а беше финалист за „Наградата за имагинарни хоризонти“ како и за наградата „Аурора Бореалис“.
Сместен некаде на студениот Север, овој елегантен и изненадувачки роман сочинет од поврзани приказни ги следи ликовите околу изолираното, чудовишно село на студените, Шиверинг Хајтс, каде што комуницираат чудни и футуристички биолошки форми на живот. Меѓу најчудните од овие форми на живот се луѓето, иако читателите ќе откријат и други. Писмото на Вадне е сурово, еротично и наликува на сон. Или, доколку ги сакате Кроненберг, Кафка и Велс, тогаш Фауна е роман за вас, бидејќи го прикажува хипнотичкиот дарвинов кошмар до кој ќе не доведат нашата негрижа и негирање во годините што претстојат.
Оваа фантастична еко-фикција ги воодушеви и читателите и критичарите, кои не штедеа пофални зборови за романот.
„За разлика од уништените предели што честo се среќаваат во научната фантастика, она што Кристијан Вадне го нуди овде е визија, во форма на почит кон соништата примитивен, кон животот што жестоко се прилагодува, по секоја цена, сакале ние или не. Вадне е нов романсиер кој треба да се следи“. La Presse +
„Фауна е рамо до рамо со Овидиј, Кафка и Велс, додека на сцената влегуваат прекрасни суштества што предизвикуваат страв кога ќе се појават од густата амбиентална магла. ” Le Devoir
„Фауна, прекрасен примерок – книга, возвишен текст, е едно од оние дела што некого збунуваат и определуваат категории читатели.” Solaris
Кристијан Вадне е канадска франкофонска писателка, родена 1986 година во Квебек. Пред објавувањето на романот Фауна, со години работела во книжевната заедница како програмерка на настани и менаџерка на проекти. Дејствието во Фауна, роман сочинет од поврзани приказни, се случува во иднината по климатските промени кога луѓето се борат со мистериозната епидемија додека другите видови се прилагодуваат и размножуваат. Успехот и многуте награди со дебитантскиот роман на Кристијан Вадне широко ѝ ги отворија вратите во книжевниот свет.
Пронајдете не на следниве мрежи:
