Вечерашниот собир „Еден од пет милиони” во Белград заврши со повик до власта да ги исполни барањата на опозицијата во рок од шест денови, во спротивно седмиот ден ќе биде организиран уште поголем протест. На протестот последни говореа лидерите на опозицијата, кои бараат формирање на заедничка комисија на Владата и опозицијата за дефинирање на фер и чесни изборни услови, изборот на нов состав на Регулаторното тело за електронски медиуми и изборот на технички и уреднички тим на Радио-Телевизија на Србија и Радио Телевизија Војводина.
На протестот, кој мина мирно и без инциденти, според Зоран Живковиќ присуствувале 35.000 лица и е најголем по оној на 5 октомври, додека власта тврди дека имало околу 7.500 луѓе.