Унгарскиот премиер Виктор Орбан го нарече апсурдно барањето на претседателката на Европската комисија Урсула Фон дер Лајен до членките на ЕУ за дополнително финансирање за Украина и војната во таа земја и рече дека одговорот на Будимпешта ќе следи без одложување.

Тој напиша на мрежата X дека фон дер Лајен, ни помалку ни повеќе, бара дополнителни 145 милијарди евра во текот на две години, што е 65 проценти од годишниот економски приход на Унгарија, седум години пензии за сите унгарски пензионери и речиси три четвртини од годишниот буџет на ЕУ.

„Тоа е астрономска сума што едноставно не постои денес. „Магичниот трик“ на Брисел повторно ќе биде заеднички европски заем, кој ќе обезбеди нашите внуци да ги платат и трошоците за руско-украинската војна“, рече Орбан.

Унгарскиот премиер истакна дека ЕУ очекува Унгарија, која е казнета со еден милион евра дневно поради одбивање да прифати мигранти, да учествува во ова.

„Тие го бараат ова од земја која е финансиски казнета поради својот став за војната и родовата идеологија. Ова е повеќе од невозможно, категорично апсурдно. Одговорот на Унгарија ќе следи без одлагање“, додаде Орбан.